អនុប្រធានាធិបតីអាមេរិក៖ សង្រ្គាមនៅអ៊ុយក្រែន នឹងមិនចប់ក្នុងពេលឆាប់ៗនោះទេ

 ប្រភព៖ Reuters

វ៉ាស៊ីនតោន៖ អនុប្រធានាធិបតីអាមេរិក លោក JD Vance បាននិយាយថា សង្រ្គាមនៅអ៊ុយក្រែន នឹងមិនអាចបញ្ចប់ក្នុងពេលឆាប់ៗទេ។

ក្នុងកិច្ចសម្ភាសមួយជាមួយប្រព័ន្ធផ្សព្វផ្សាយអាមេរិក Fox News នៅថ្ងៃព្រហស្បតិ៍ ទី១ ខែឧសភា នេះលោក Vance បានលើកឡើងថា សំណួរដែលកំពុងប្រឈមរដ្ឋាភិបាលអាមេរិកនាពេលនេះ គឺថាតើទីក្រុងវ៉ាស៊ីនតោន អាចជួយរុស្ស៉ីនិងអ៊ុយក្រែនស្វែងរក ការព្រមព្រៀងគ្នាដោយរបៀបណា ដើម្បីបិទបញ្ចប់សង្រ្គាមដែលបានអូសបន្លាយអស់រយៈពេលជាង ៣ឆ្នាំមកហើយ។

លោក Vance បានសង្កត់ធ្ងន់ថា «ចុងក្រោយបំផុត អ្វីៗគឺស្រេចតែទៅលើរុស្ស៉ីនិងអ៊ុយក្រែនផ្ទាល់ប៉ុណ្ណោះ ដើម្បីព្រមព្រៀងគ្នា ហើយបញ្ឈប់ជម្លោះដ៏អាក្រក់មួយនេះ ខណៈសម្រាប់ឥឡូវ គឺភ្លើងសង្រ្គាមហាក់មិនកំពុងរលត់ទៅវិញទេ ពោលគឺវានឹងមិនអាចបញ្ចប់ក្នុងពេលឆាប់ៗឡើយ»។

សូមជម្រាបថា តាំងតែពីមុនពេលជាប់ឆ្នោតជាប្រធានាធិបតីអាមេរិក លោក ដូណាល់ ត្រាំ បានអះអាងថា រដ្ឋបាលរបស់លោក នឹងរំលត់សង្រ្គាមនៅអ៊ុយក្រែន ដោយប្រើប្រាស់ពេលត្រឹម ២៤ម៉ោងប៉ុណ្ណោះ។ ក្នុងសប្តាហ៍នេះ លោក ត្រាំ បានអះអាងថា អ៊ុយក្រែនប្រហែលជាស្ម័គ្រចិត្តលះបង់តំបន់គ្រីមៀ ដែលរុស្ស៉ីបានក្រសោបយកទៅគ្រប់គ្រង តាំងតែពីឆ្នាំ២០១៤មក ប៉ុន្តែប្រធានាធិបតីអ៊ុយក្រែន បាននិយាយថា រូបលោកនឹងមិនអាចទទួលស្គាល់ ការកាន់កាប់របស់រុស្ស៉ីនៅឧបទ្វីបនោះឡើយ ដោយសាររដ្ឋធម្មនុញ្ញរបស់អ៊ុយក្រែន៕