សម្តេចធិបតី ហ៊ុន ម៉ាណែត៖ កុំមើលការបំពេញកាតព្វកិច្ចយោធាជាបន្ទុក តែត្រូវមើលជាឱកាស

ភ្នំពេញ ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា មានប្រសាសន៍ថា កុំមើលការបំពេញ កាតព្វកិច្ចយោធាជាបន្ទុក ប៉ុន្តែត្រូវមើលជាឱកាស ព្រោះរដ្ឋបានវិនិយោគ ច្រើនក្នុងវិស័យយោធា ដើម្បីពង្រឹងសមត្ថភាពឱ្យកាន់តែខ្លាំង។

ថ្លែងក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ក្នុងពិធីប្រគល់សញ្ញាបត្រជូនដល់និស្សិតជ័យលាភីនៃសាកលវិទ្យាល័យ អាស៊ី អឺរ៉ុប នាព្រឹកថ្ងៃទី០២ ខែតុលា ឆ្នាំ២០២៦នេះ សម្ដេចធិបតីបានបញ្ជាក់ថា ការបង្កើតឱ្យមានកាតព្វកិច្ចយោធា គឺជាការវិនិយោគរបស់រដ្ឋក្នុងការកសាងធនធានមនុស្សមួយដែលមានឥរិយាបថត្រឹមត្រូវ វិន័យ ជំនាញ និងបំណិន ក្រោមការអប់រំ បណ្ដុះបណ្ដាល អនុវត្តវិន័យយ៉ាងតឹងរឹង និងការធ្វើការជាក្រុមដើម្បីជួយគ្នាសម្រេចភារកិច្ច។

បើតាមសម្តេចធិបតី បានមានប្រសាសន៍ថា សម្រាប់ថ្ងៃទី១ នៃការប្រកាសទទួលពាក្យ សម្រាប់យុវជនមកបំពេញ កាតព្វកិច្ចយោធា មានយុវជនប្រមាណជាជិត៣ពាន់នាក់ បានដាក់ពាក្យស្នើសុំ ។

សូមជម្រាបថា យុវជន យុវនារី ដែលមានបំណងស្ម័គ្រចិត្តចូលរួម អាចអញ្ជើញទៅទទួល និង​ដាក់​ពាក្យ​នៅ​មូលដ្ឋាន​ក​ង​រាជ​អាវុធ​ហត្ថ​ក្រុង ស្រុក ខណ្ឌ នៃទីលំនៅរបស់ខ្លួន តាម​កាល​បរិច្ឆេទ​ ​៖ ទទួលពាក្យ៖ ថ្ងៃទី១–៩ ខែតុលា ឆ្នាំ២០២៦ និងដាក់ពាក្យ៖ ថ្ងៃទី១០–១៥ ខែតុលា ឆ្នាំ២០២៦។ ចូលរួមដោយឆន្ទៈ ហ្វឹកហាត់ដោយវិន័យ បំពេញកាតព្វកិច្ចចំពោះជាតិ៕