អ៊ីរ៉ង់ បន្ថែមនាវា ១១គ្រឿងទៀតចូលក្នុងបញ្ជីខ្មៅ ហាមឃាត់ឆ្លងកាត់ច្រកសមុទ្រ Hormuz

ឡុងដ៍៖ ប្រទេសអ៊ីរ៉ង់បានបន្ថែមនាវាចំនួន ១១គ្រឿងទៀត ចូលទៅក្នុងបញ្ជីខ្មៅ នៃនាវាដែលមិនគោរពតាមបទប្បញ្ញត្តិ និងត្រូវប្រឈមនឹងការពិន័យ ឬការរឹបអូស ប្រសិនបើធ្វើដំណើរឆ្លងកាត់ច្រកសមុទ្រ Hormuz ដែលធ្វើឱ្យចំនួននាវាសរុបកើនដល់ ៥៦គ្រឿង។

អាជ្ញាធរគ្រប់គ្រងច្រកសមុទ្រឈូងសមុទ្រពែក្ស (PGSA) របស់អ៊ីរ៉ង់ បានបញ្ជាក់ថា បញ្ជីខ្មៅនេះរួមបញ្ចូលទាំងនាវាដឹកប្រេងឆៅធុនធំ (VLCC) និងនាវាដឹកឧស្ម័នធម្មជាតិរាវ (LNG) ព្រមទាំងបានព្រមានថារាល់នាវាណាដែលសហការផ្ទេរប្រេងជាមួយនាវាជាប់បញ្ជីខ្មៅ ក៏នឹងត្រូវរងទណ្ឌកម្មដូចគ្នាដែរ។ វិធានការនេះ បានជំរុញឱ្យក្រុមហ៊ុនថាមពលពិភពលោក និងក្រុមហ៊ុនចម្រាញ់ប្រេងមួយចំនួន ផ្អាកការប្រើប្រាស់នាវាទាំងនោះដោយសារក្តីបារម្ភផ្នែកសុវត្ថិភាព។

សូមជម្រាបថា ច្រកសមុទ្រ Hormuz ធ្លាប់បានដឹកជញ្ជូនប្រេងប្រមាណ ២០ភាគរយ នៃពិភពលោក ប៉ុន្តែចរាចរណ៍នាវាចរណ៍បានធ្លាក់ចុះស្ទើរតែទាំងស្រុង ចាប់តាំងពីសង្គ្រាមរវាងសហរដ្ឋអាមេរិក និងអ៊ីរ៉ង់ បានផ្ទុះឡើងកាលពី ៦ខែមុនមកម្ល៉េះ៕ (Reuters)