អ៊ីរ៉ង់ បើកការវាយប្រហារលើមូលដ្ឋានយោធាអាមេរិកនៅតំបន់ឈូងសមុទ្រ

ឌូបៃ៖ កងកម្លាំងប្រដាប់អាវុធអ៊ីរ៉ង់ បានបើកការវាយប្រហារទៅលើហេដ្ឋារចនាសម្ព័ន្ធយោធារបស់សហរដ្ឋអាមេរិក នៅក្នុងបណ្តាប្រទេសជិតខាងក្នុងតំបន់ឈូងសមុទ្រ នៅថ្ងៃព្រហស្បតិ៍នេះ បន្ទាប់ពីកងទ័ពអាមេរិកបានវាយប្រហារតាមអាកាសមកលើខេត្តភាគខាងត្បូង និងភាគខាងកើតប្រទេសអ៊ីរ៉ង់ ដែលសកម្មភាពនេះកំពុងដាក់សម្ពាធយ៉ាងធ្ងន់ធ្ងរដល់កិច្ចព្រមព្រៀងបទឈប់បាញ់រយៈពេល ៣សប្តាហ៍មកនេះ។

ទន្ទឹមនឹងការវាយប្រហារសងសឹកនេះ អ៊ីរ៉ង់ក៏កំពុងត្រៀមរៀបចំពិធីបញ្ចុះសពអតីតមេដឹកនាំកំពូល លោក អាយ៉ាតូឡា អាលី ខាមេណៃ (Ayatollah Ali Khamenei) នៅឯទីសក្ការៈបូជាដ៏វិសុទ្ធបំផុតក្នុងទីក្រុង Mashhad នៅភាគឦសានប្រទេសផងដែរ បន្ទាប់ពីបានរៀបចំពិធីហែសពយ៉ាងធំដុំអស់រយៈពេលមួយសប្តាហ៍រួចមក។ ទីភ្នាក់ងារសារព័ត៌មាន Fars បានឱ្យដឹងថា កងទ័ពអាកាសអ៊ីរ៉ង់បានប្រើប្រាស់យន្តហោះចម្បាំង MiG-29 ដើម្បីហោះហើរការពារដែនអាកាសពីលើពិធីហែសពនេះ។

យោធាអាមេរិកបានអះអាងថា ការវាយប្រហារចុងក្រោយរបស់ខ្លួនលើអ៊ីរ៉ង់ គឺក្នុងគោលបំណងបើកច្រកសមុទ្រហ័រមូសឱ្យនៅដំណើរការ បន្ទាប់ពីចោទប្រកាន់ថាអ៊ីរ៉ង់បានវាយប្រហារនាវាដឹកប្រេង ៣គ្រឿង។ ការវាយប្រហាររបស់អាមេរិកនេះ កើតឡើងប៉ុន្មានម៉ោងប៉ុណ្ណោះ ក្រោយលោក ដូណាល់ ត្រាំប្រកាសថាបទឈប់បាញ់បណ្តោះអាសន្នត្រូវបាន «បញ្ចប់ហើយ»។

ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ថា ការវាយប្រហាររបស់អាមេរិកចន្លោះថ្ងៃទី០៨ និង០៩ ខែកក្កដា បានសម្លាប់មនុស្ស ១៤នាក់ និងរបួស ៧៨នាក់ នៅទូទាំង ៥ខេត្ត។ ទីភ្នាក់ងារ Fars ក៏បានបន្ថែមថា ការវាយប្រហារមួយបានបាញ់ចំស្ពានផ្លូវដែក ដែលប្រើសម្រាប់ពាណិជ្ជកម្មជាមួយរុស្ស៊ី និងចិនផងដែរ។​ ដោយឡែក សំឡេងផ្ទុះជាច្រើនក៏ត្រូវបានគេឮផងដែរនៅក្នុងខេត្ត Bushehr និងទីក្រុងកំពង់ផែ Bandar Abbas៕