ហ្សេលេនស្គី៖ អ៊ុយក្រែន ត្រូវស្វែងរកភាពរីកចម្រើនក្នុងកិច្ចចរចាសន្តិភាពឱ្យបានមុនរដូវរងា

បរទេស៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយក្នុងបទសម្ភាសន៍មួយដែលត្រូវបានចាក់ផ្សាយកាលពីថ្ងៃអាទិត្យ ទី៣១ ខែឧសភា ឆ្នាំ២០២៦ ថារូបលោកចង់បានភាពរីកចម្រើន ក្នុងកិច្ចចរចាសន្តិភាពជាមួយរុស្ស៉ី ឱ្យបានមុនរដូវរងាចូលមកដល់ ដើម្បីពង្រឹងគោលជំហរយុទ្ធសាស្ត្ររបស់ទីក្រុងកៀវឱ្យមានភាពល្អប្រសើរ។

កិច្ចចរចាសម្របសម្រួលដោយសហរដ្ឋអាមេរិកលើការឆ្ពោះទៅរកកិច្ចព្រមព្រៀងសន្តិភាពបានជាប់គាំង ដោយសារតែទីក្រុងវ៉ាស៊ីនតោនកំពុងផ្តោតលើសង្រ្គាមអ៊ីរ៉ង់។ លោក ហ្សេលេនស្គី និងក្រុមមន្ត្រីអ៊ុយក្រែនបាននិយាយថាភាពរីកចម្រើននៅលើសមរភូមិរបស់កងកម្លាំងរុស្ស៉ីត្រូវបានពន្យឺត ខណៈអ៊ុយក្រែនបង្កើនការវាយប្រហាររយៈចម្ងាយមធ្យម និងចម្ងាយឆ្ងាយចូលជ្រៅក្នុងទឹកដីរុស្ស៉ី ជាមួយការផ្តោតជាសំខាន់លើឧស្សាហកម្មប្រេងរុស្ស៉ី។

ក្នុងបទសម្ភាសន៍មួយកម្មវិធី Face the Nation របស់ទូរទស្សន៍អាមេរិក CBS លោក ហ្សេលេនស្គីបានលើកឡើងថា «ចាប់ផ្ដើមកាលពីខែធ្នូ ឆ្នាំ២០២៥ រុស្ស៉ីបានចាប់ផ្ដើមបាត់បង់ការមានប្រៀបនៅលើសមរភូមិ។ ដូច្នេះ... នៅមុនរដូវរងាចូលមកដល់ យើងចាំបាច់ត្រូវស្វែងរកមធ្យោបាយមួយ នោះគឺមធ្យោបាយតាមផ្លូវការទូតដើម្បីអាចអង្គុយចុះ និងធ្វើការចរចា»។ លោកបន្ថែមថា «ភាពរីកចម្រើនគឺអាស្រ័យលើការដាក់សម្ពាធលើប្រធានាធិបតីរុស្ស៉ី លោក វ្ល៉ាឌីមៀ ពូទីន ជាពិសេសគឺសម្ពាធក្នុងសង្គមរបស់លោក ហើយខ្ញុំគិតថាការបង្កើនសម្ពាធតាមរយៈការដាក់ទណ្ឌកម្មគួរតែបង្កើន មិនមែនបន្ធូរបន្ថយនោះទេ»។

តាមលោក ហ្សេលេនស្គី វាអាចមានលទ្ធភាពនៃកិច្ចចរចារៀបចំឡើងដោយការជួយពីអឺរ៉ុប ឬកិច្ចចរចាទ្វេភាគីជាមួយរុស្ស៉ី ប៉ុន្តែលោកនៅតែទទូចឱ្យមានការដាក់ទណ្ឌកម្មឱ្យបានខ្លាំងក្លាលើរុស្ស៉ី។

ក្នុងកិច្ចសម្ភាសន៍ខាងលើ លោក ហ្សេលេនស្គីក៏បានសង្កត់ធ្ងន់ដែរថាដោយសារតែអវត្តមាននៃកម្មវិធីប្រព័ន្ធខែលប្រឆាំងមីស៊ីលអឺរ៉ុប អ៊ុយក្រែននៅតែត្រូវការជាចាំបាច់ការគាំទ្រពីសហរដ្ឋអាមេរិក ក្នុងការផ្គត់ផ្គង់ប្រព័ន្ធការពារ ដែនអាកាស៕