៥ខែ ពាណិជ្ជកម្មកម្ពុជា-ថៃ មានទំហំជាង១.១ពាន់លានដុល្លារ ធ្លាក់ចុះជិត៤០% ខណៈការនាំចូលពីថៃធ្លាក់ចុះជាង៤០%

ភ្នំពេញ៖ យោងតាមទិន្នន័យពីអគ្គនាយកដ្ឋានគយ និងរដ្ឋាករកម្ពុជាបានឱ្យដឹងថា ក្នុងរយៈពេល ៥ ខែដើមឆ្នាំ ២០២៦ នេះ ការធ្វើពាណិជ្ជកម្មរវាងកម្ពុជា-ថៃ មានទំហំជាង ១.១ ពាន់លានដុល្លារ ធ្លាក់ចុះ ៣៨.៧%។ តែយ៉ាងណា ថៃនៅតែជាដៃគូពាណិជ្ជកម្មធំជាងគេលំដាប់ទី ៥ របស់កម្ពុជា បន្ទាប់ពីប្រទេសចិន អាមេរិក វៀតណាម និងជប៉ុន។

តាមទិន្នន័យបានបង្ហាញថា ចាប់ពីខែមករា ដល់ខែឧសភា ឆ្នាំ ២០២៦ ការនាំចេញ-នាំចូលទំនិញរវាងកម្ពុជា-ថៃ មានទឹកប្រាក់សរុបជាង ១.១ ពាន់លានដុល្លារ ធ្លាក់ចុះ ៣៨.៧% បើធៀបនឹងរយៈពេលដូចគ្នាក្នុងឆ្នាំ ២០២៥ ដែលមានតម្លៃជាង ១.៨ ពាន់លានដុល្លារ។ ក្នុងនោះ ថៃនាំចូលទំនិញមកកម្ពុជាមានតម្លៃ ៨៥៤ លានដុល្លារ ថយចុះ ៤២.៤% ស្របពេលកម្ពុជានាំចេញទៅថៃវិញមានតម្លៃជាង ២៩៦ លានដុល្លារ ថយចុះ ២៥%។

ប្រភពឱ្យដឹងថា នាពេលកន្លងមកការនាំចូលពីថៃ ភាគច្រើនជាប្រភេទទំនិញ សម្ភារ និងវត្ថុធាតុដើមដែលប្រើប្រាស់ចាំបាច់សម្រាប់បម្រើដល់ឧស្សាហកម្ម និងផលិតកម្ម ដូចជា គ្រឿងបង្គុំ គ្រឿងបន្លាស់ គ្រឿងដំឡើង គ្រឿងសម្រាប់ជួសជុល និងវត្ថុធាតុដើមសម្រាប់ឧស្សាហកម្ម ដែលត្រូវបាននាំចូលតាមផ្លូវទឹក បន្ទាប់ពីប្រទេសទាំងពីរបានបិទព្រំដែនគោក។ ចំណែកការនាំចូលមុខទំនិញមួយចំនួន ដូចជា ភេសជ្ជៈ អាហារកែច្នៃមួយចំនួន ប្រេងឥន្ធនៈ បន្លែ និងផ្លែឈើ មិនត្រូវបាននាំចូលទៀតឡើយ៕