ឯកឧត្តម ម៉ៅ ធនិន ដឹកនាំកម្លាំងចម្រុះចុះបង្ក្រាបទីតាំងវេចខ្ចប់ស្ករសខុសច្បាប់លួចប្តូរសំបកពីបាវថៃ ដាក់បាវវៀតណាម ដើម្បីបន្លំភ្នែកមហាជនលក់លើទីផ្សារ
ដោយ : ទ្រី ហៀន
ខេត្តកំពត ៖ នៅរសៀលថ្ងៃទី១៣ ខែឧសភា ឆ្នាំ២០២៦ ឯកឧត្តម ម៉ៅ ធនិន អភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកំពត បានដឹកនាំកម្លាំងចម្រុះរួមមាន ស្នងការដ្ឋាននគរបាលខេត្ត, កងរាជអាវុធហត្ថខេត្ត, សាខាគយនិងរដ្ឋាករខេត្ត, សាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.), មន្ទីរពាណិជ្ជកម្មខេត្ត, អជ្ញាធរស្រុក និងតំណាងអយ្យការអមសាលាដំបូងខេត្តកំពត បានចុះបង្ក្រាបទីតាំងសិប្បកម្ម ៊វេចខ្ចប់ស្ករសខុសច្បាប់មួយកន្លែង ដែលមានទីតាំងស្ថិតក្នុងភូមិកំពង់ត្នោត ឃុំកូនសត្វ ស្រុកទឹកឈូ ខេត្តកំពត។ក្នុងប្រតិបត្តិការនេះ កម្លាំងចម្រុះបានរកឃើញភស្តុតាងនៃសកម្មភាពល្មើសច្បាប់ ដោយម្ចាស់ទីតាំងបានលួចបន្លំផ្លាស់ប្តូរសំបកបាវស្ករសដែលមានអក្សរថៃ (នាំចូលពីថៃ) មកច្រកប្តូរសំបកបាវថ្មី ដែលមានអក្សរវៀតណាម ដើដើម្បីបន្លំភ្នែកសមត្ថកិច្ច និងមហាជនដាក់លកើនៅលើទីផ្សារ។ ក្នុងប្រតិបត្តិការនេះ ឯកឧត្តម ម៉ៅ ធនិន អភិបាលខេត្តកំពត បានដាក់បទបញ្ជាវិធានការម៉ឺងម៉ាត់បំផុត ដោយគ្មានការលើកលែងឡើយ និងបានបង្គាប់ឱ្យម្ចាស់សិប្បកម្មត្រូវទូទាត់ប្រាក់ឈ្នួលជូនកម្មករឱ្យបានគ្រប់ចំនួន រួចធ្វើកំណត់ហេតុអនុញ្ញាតឱ្យពួកគេត្រឡប់ទៅផ្ទះវិញ។
ដោយឡែកអ្នកដែលពាក់ព័ន្ធកម្លាំងជំនាញចម្រុះបានហៅធ្វើកំណត់ហេតុបំភ្លឺ ដើម្បីបន្តធ្វើការស្រាវជ្រាវស្វែងរកម្ចាស់ទីតាំងពិតប្រាកដ និងអ្នកពាក់ព័ន្ធបន្ថែមទៀត ចាត់វិធានការបញ្ជូនតាមនីតិវិធីផ្លូវច្បាប់ដោយគ្មានការយោគយល់ឡើយ ។
មហាជនបានធ្វើការរិះគន់ទៅដល់មន្ត្រីជំនាញដូចជា ស្ថាប័នគយនិងរដ្ឋាករ, ស្ថាប័ន (ក.ប.ប), នគរបាលបង្ក្រាបបទល្មើសសេដ្ឋកិច្ចថា អសមត្ថភាពដែលបណ្តោយឱ្យឈ្មួញនាំចូលស្ករសពីថៃតាមចិត្ត រហូតមានទាំងឃ្លាំងសម្រាប់វេចខ្ចប់ប្តូរសំបកបាវពីថៃ មកបាវវៀតណាម ប៉ុន្តែគ្មានការត្រួតពិនិត្យទាល់តែអភិបាលខេត្តដឹកមកកម្លាំងចុះបង្ក្រាប ទើបបែកសំបុក៕
Post a Comment