អនុប្រធានាធិបតីអាមេរិក អះអាងថា កិច្ចចរចាជាមួយអ៊ីរ៉ង់ មានភាពរីកចម្រើនជាច្រើន

វ៉ាស៊ីនតោន៖ អនុប្រធានាធិបតីអាមេរិក លោក JD Vance បាននិយាយថាសហរដ្ឋអាមេរិក និងអ៊ីរ៉ង់បានបង្កើតភាពរីកចម្រើនយ៉ាងច្រើននៅក្នុងកិច្ចចរចារវាងប្រទេសទាំង២ ហើយថាគ្មានភាគីណាមួយចង់ឃើញសង្រ្គាមផ្ទុះឡើងវិញនោះទេ។

ថ្លែងទៅកាន់ក្រុមអ្នកសារព័ត៌មាននៅឯសេតវិមាន កាលពីថ្ងៃអង្គារ ទី១៩ ខែឧសភា ឆ្នាំ២០២៦ លោក JD Vance បានគូសបញ្ជាក់ដូច្នេះថា «យើងគិតថាយើងបានបង្កើត ភាពរីកចម្រើនជាច្រើន។ យើងគិតថាអ៉ីរ៉ង់ចង់បានកិច្ចព្រមព្រៀង»។ លោក​ JD Vance បានបន្ថែមទៀតថាលោកក៏ទើបតែបានជជែកផងដែរជាមួយលោក ដូណាល់ ត្រាំ ដែល បានសង្កត់ធ្ងន់ថាបញ្ហាស្នូលដែលសហរដ្ឋអាមេរិកត្រូវដោះស្រាយ នោះគឺធ្វើយ៉ាងណារារាំងអ៊ីរ៉ង់មិនឱ្យមានអាវុធនុយក្លេអ៊ែរ។ ដ្បិតបើតាមលោក Vance ប្រសិនបើអ៊ីរ៉ង់មាន អាវុធនុយក្លេអ៊ែរ នោះប្រទេសផ្សេងទៀតក្នុងតំបន់មជ្ឈិមបូព៌ា និងនៅជុំវិញពិភពលោកនឹងចង់បានអាវុធនុយក្លេអ៊ែរដែរ។

ដោយឡែក នៅពេលត្រូវបានសាកសួរថាតើរុស្ស៉ីអាចនឹងទទួលកាន់កាប់អ៊ុយរ៉ាញ៉ូមចម្រាញ់រួចរបស់អ៊ីរ៉ង់ដែរឬក៏យ៉ាងណា? លោក Vance បានឆ្លើយថាបច្ចុប្បន្ននេះមិនមែនជា គម្រោងរបស់រដ្ឋាភិបាលសហរដ្ឋអាមេរិកនោះទេ ហើយអ៊ីរ៉ង់ក៏មិនបានលើកឡើងពីបញ្ហានេះដែរ៕ (Reuters)