ជប៉ុន ត្រៀមបំពាក់ប្រព័ន្ធមីស៊ីល នៅលើកោះ Yonaguni ក្បែរតៃវ៉ាន់

តូក្បូ៖ រដ្ឋមន្រ្តីការពារជាតិជប៉ុន បាននិយាយកាលពីថ្ងៃអង្គារសប្តាហ៍នេះថា រដ្ឋាភិបាលជប៉ុន នឹងដាក់ពង្រាយមីស៊ីលបាញ់ចេញពីដីគោកទៅ​អាកាស​ នៅលើ​កោះ​ភាគ​ខាងលិច​ដាច់ស្រយាល​មួយ​របស់​ខ្លួន​ ដែលស្ថិតនៅក្បែរ​កោះតៃវ៉ាន់​ ឱ្យបានត្រឹមឆ្នាំ ២០៣១។

ក្នុងសន្និសីទសារព័ត៌មាននៅទីក្រុងតូក្យូ លោក Shinjiro Koizumi បញ្ជាក់ថាការដាក់ពង្រាយនៅលើកោះ Yonaguni នឹងប្រព្រឹត្តទៅអំឡុងឆ្នាំ ២០៣០ ដែលបញ្ចប់ត្រឹមខែមីនា នៃឆ្នាំ ២០៣១។ លោក Koizumi ដែលបានចុះទៅដល់កោះ Yonaguni កាលពីខែវិច្ឆិកា បានឱ្យដឹងទៀតថា ក្រសួងការពារជាតិនឹងធ្វើសន្និសីទសារព័ត៌មានមួយ សម្រាប់អ្នកស្រុក នាសប្តាហ៍ក្រោយ នៅឯកោះ Yonaguni នោះតែម្តង។ កោះ Yonaguni ស្ថិតនៅចម្ងាយប្រហែល ១១០គីឡូម៉ែត្រភាគខាងកើតកោះតៃវ៉ាន់ និងចម្ងាយ ១ ៩០០គីឡូម៉ែត្រពីទីក្រុងតូក្យូ។

សូមជម្រាបថា នេះគឺជាលើកដំបូងហើយដែលជប៉ុន បង្ហាញកាលបរិច្ឆេទជាក់លាក់សម្រាប់ការដាក់ពង្រាយមីស៊ីល។ វាស្ថិតក្នុងផែនការដែលប្រកាសកាលពីឆ្នាំ ២០២២ ដើម្បីបង្កើនការការពារដែនអាកាសនៅលើកោះ ដែលមានមូលដ្ឋានទ័ពជប៉ុនស្រាប់៕ (AFP)