ត្រាំ អញ្ជើញប្រធានាធិបតីកូឡុំប៊ីធ្វើទស្សនកិច្ចទៅកាន់សេតវិមាន ក្រោយការសម្លុតគំរាម

វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃពុធ ទី៧ ខែមករា បានអញ្ជើញប្រធានាធិបតីកូឡុំប៊ី លោក Gustavo Petro ធ្វើទស្សនកិច្ច ទៅកាន់សេតវិមាន តែប៉ុន្មានថ្ងៃប៉ុណ្ណោះបន្ទាប់ពីលោកបានគំរាមមេដឹកនាំកូឡុំប៊ីជាមួយការធ្វើសកម្មភាពយោធាជុំវិញការចោទប្រកាន់ពីការរត់ពន្ធគ្រឿងញៀន។

ការកត់សម្គាល់បែបនេះរបស់លោក ត្រាំ ធ្វើឡើងបន្ទាប់ពីរូបលោកបានបើកកិច្ចពិភាក្សាតាមទូរស័ព្ទជាមួយលោក Petro ដែលជាកិច្ចសន្ទនាតាមទូរស័ព្ទលើកដំបូងបំផុត រវាងមេដឹកនាំទាំង២ ចាប់តាំងពីលោក ត្រាំ ស្បថចូលកាន់តំណែងជាប្រធានាធិបតីអាមេរិកកាលពីខែមករាឆ្នាំមុនមក។ តាមលោក ត្រាំ រូបលោកមានគម្រោងជួបលោក Petro ក្នុងពេលអនាគតដ៏ខ្លីខាងមុខ។

ថ្លែងទៅកាន់ក្រុមអ្នកសារព័ត៌មាននៅលើយន្ដហោះ Air Force One កាលពីថ្ងៃអាទិត្យចុងសប្ដាហ៍កន្លងទៅ លោក ត្រាំ ក៏បាន ព្រមានពីការធ្វើសកម្មភាពយោធាប្រឆាំងនឹងកូឡុំប៊ីផងដែរ។ លោក ត្រាំ បានចោទប្រកាន់ដោយមិនបានបង្ហាញភស្តុតាងថាមេដឹកនាំកូឡុំប៊ីមានជាប់ពាក់ព័ន្ធនឹង ការជួញដូរគ្រឿងញៀន ហើយបានដាក់ទណ្ឌកម្មហិរញ្ញវត្ថុលើលោក Petro និងក្រុមគ្រួសាររបស់លោកទៀតផង។

លោក Petro បានអំពាវនាវឱ្យមានការធ្វើបាតុកម្មតវ៉ានៅទូទាំងកូឡុំប៊ី កាលពីថ្ងៃពុធ ដើម្បីប្រឆាំងនឹងការសម្លុតគំរាមរបស់លោក ត្រាំ។ លោកបានរិះគន់ធ្ងន់ៗប្រឆាំងនឹងសហរដ្ឋអាមេរិក។ ប៉ុន្តែ ក្រោយកិច្ចពិភាក្សាតាមទូរស័ព្ទជាមួយលោក ត្រាំ លោក Petro ហាក់បន្ទន់ជំហរ និងបន្ថយសំឡេងវិញ ដោយនិយាយថារូបលោកបានស្នើទៅកាន់លោក ត្រាំថាប្រទេសទាំង២គួរតែបង្កើតការទំនាក់ទំនងគ្នាដោយផ្ទាល់ឡើងវិញរវាងកម្រិតរដ្ឋមន្ត្រីការបរទេស និងប្រធានាធិបតី៕ (AFP)