NBC៖ ទំហំទឹកប្រាក់វិនិយោគលើគម្រោងសំណង់ និងការនាំចូលសម្ភារៈសំណង់ មានកំណើនគួរឱ្យកត់សម្គាល់ ក្នុងឆមាសទី១

ភ្នំពេញ៖ ក្នុងឆមាសទី១ ឆ្នាំ២០២៥នេះ តម្លៃគម្រោងសំណង់ទទួលបានការអនុម័តបាន កើនឡើង៣៧.៧% ខណៈការនាំចូលសម្ភារ និងបរិក្ខារសំណង់បានកើនឡើង ៤៤.១% បើធៀបរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍ប្រចាំឆមាសទី១ និងទិសដៅការងារឆមាសទី២ របស់ធនាគារជាតិនៃកម្ពុជា​ (NBC)។

របាយការណ៍នេះបានបញ្ជាក់ថា ក្នុងឆមាសទី១ ឆ្នាំនេះ តម្លៃគម្រោងសំណង់ទទួលបានការអនុម័តកើនឡើង ៣៧.៧% ដែលតម្លៃប្រហែលជិត៥ពាន់លានដុល្លារ ​ក្នុងនោះ សំណង់ឧស្សាហកម្ម​ កើនឡើង ៩៣.៣% សំណង់លំនៅឋានកើនឡើង ៨៤% និង សំណង់ផ្សេងៗ ​កើនឡើង ៣៩.៨% ស្របពេលសំណង់សាធារណៈ​កើន ២.៤%។​ រីឯការនាំចូលសម្ភារនិងបរិក្ខារសំណង់វិញបានកើនឡើងខ្ពស់គួរឱ្យកត់សម្គាល់ ដោយកើនឡើង ៤៤.១% ធៀបនឹងគ្រាដូចគ្នាកាលពីឆ្នាំមុន ដែលតម្លៃប្រមាណជិត១៥០០លានដុល្លារ។ ​

​យ៉ាងនេះក្តី ធនាគារជាតិបានលើកឡើងថា ទោះជាការនាំចូលសម្ភារ និងបរិក្ខារសំណង់កើនឡើងខ្ពស់ ប៉ុន្តែវិស័យសំណង់នៅតែបន្តមានកំណើនទាប ០.៧% ​​​ស្របពេលដែលលំហូរវិនិយោគផ្ទាល់បរទេសទៅកាន់វិស័យសំណង់បន្តធ្លាក់ចុះ ១៤%។

រីឯវិស័យអចលនទ្រព្យវិញ បន្តមានកំណើនទាប ០.៨% ដោយសារការធ្លាក់ចុះនៃថ្លៃ និងទំហំឥណទាន សម្រាប់លំនៅឋាន ស្របពេលដែលការវិនិយោគផ្ទាល់បរទេសក្នុងវិស័យនេះធ្លាក់ចុះ។

ធនាគារជាតិបានបញ្ជាក់ដែរថា សន្ទស្សន៍ថ្លៃលំនៅឋាន (RPPI) រួមបានថយចុះជាមធ្យម ​៣.៦% ដែលក្នុងនោះនៅរាជធានីភ្នំពេញ បានថយ ​៣.៦% និង​តាមបណ្តាខេត្តបានថយចុះ៧.១% ​។ ជាមួយគ្នានេះ ទំហំឥណទានសម្រាប់លំនៅឋានបែងចែក តាមប្រភេទ សមាមាត្រ ៤៨.៦% នៃឥណទានសរុបបានថយចុះប្រមាណ​១៧.២%។​

​ធនាគារជាតិនៃកម្ពុជា បន្តសហការយ៉ាងជិតស្និទ្ធជាមួយនឹងសមាគមធនាគារនៅកម្ពុជា និងសមាគមមីក្រូហិរញ្ញវត្ថុកម្ពុជា ក្នុងការគាំទ្រការផ្តល់ឥណទានទៅកាន់វិស័យសំខាន់ៗ ការបន្ធូរបន្ថយអត្រាការប្រាក់ ការរៀបចំឥណទានឡើងវិញ ការសម្រួលលក្ខខណ្ឌឥណទាន ជាពិសេសទៅកាន់វិស័យអចលនទ្រព្យ កសិកម្ម ព្រមទាំងសហគ្រាសធុនមីក្រូ តូច និងមធ្យម ស្របតាមគោលនយោបាយរបស់រាជរដ្ឋាភិបាល៕