នៅកិច្ចប្រជុំបន្ទាន់ក្រុមប្រឹក្សាសន្តិសុខអង្គការសហប្រជាជាតិ កម្ពុជាស្នើឱ្យមានការឈប់បាញ់គ្នាជាបន្ទាន់ និងឥតលក្ខខណ្ឌ ហើយមានដំណោះស្រាយដោយសន្តិវិធី

ភ្នំពេញ៖ លោក ជុំ សុន្ទរី អ្នកនាំពាក្យក្រសួងការបរទេសកម្ពុជាបានថ្លែងថា នៅក្នុងកិច្ចប្រជុំបន្ទាន់ក្រុមប្រឹក្សាសន្តិសុខអង្គការសហប្រជាជាតិ (UNSC) កម្ពុជាបានស្នើឱ្យមានការឈប់បាញ់គ្នាជាបន្ទាន់ និងឥតលក្ខខណ្ឌ ហើយមានដំណោះស្រាយដោយសន្តិវិធី។

លោកបានថ្លែងបែបនេះ ក្នុងឱកាសអ្នកនាំពាក្យរាជរដ្ឋាភិបាលកម្ពុជា ធ្វើសន្និសីទសារព័ត៌មានបង្ហាញបច្ចុប្បន្នភាព ថ្ងៃទី៣ នៃការបង្កសង្គ្រាមរបស់យោធាថៃឈ្លានពានដែនអធិបតេយ្យកម្ពុជា នាព្រឹកថ្ងៃទី២៦ ខែកក្កដា ឆ្នាំ២០២៥។

ក្រុមប្រឹក្សាសន្តិសុខអង្គការសហប្រជាជាតិ (UNSC) បានកោះប្រជុំបន្ទាន់ពិភាក្សាលើជម្លោះកម្ពុជា-ថៃ នៅម៉ោង៣រសៀល ម៉ោងនៅទីក្រុងញូវយ៉ក ត្រូវនឹងម៉ោង ២ទៀបភ្លឺ ថ្ងៃទី២៦ ខែកក្កដា ឆ្នាំ២០២៥ ម៉ោងនៅកម្ពុជា។ តំណាងអចិន្ត្រៃយ៍កម្ពុជា ប្រចាំអង្គការសហប្រជាជាតិ បានចូលរួមថ្លែងបទអន្តរាគមន៍ នៅក្នុងកិច្ចប្រជុំបន្ទាន់ UNSC នេះ។

ក្នុងបទអន្តរាគមន៍ នៅក្នុងកិច្ចប្រជុំបន្ទាន់ UNSC កម្ពុជាបង្ហាញពីការវាយលុកទ្រង់ទ្រាយធំរបស់ថៃមកលើកម្ពុជា ដោយប្រើយន្តហោះចម្បាំង គ្រាប់បែកចង្កោម និងអាវុធទំនើបៗជាច្រើន។

លោក ជុំ សុន្ទរី បានបញ្ជាក់យ៉ាងដូច្នេះ «នៅក្នុងបទអន្តរាគមន៍តំណាងអចិន្ត្រៃយ៍កម្ពុជា ក៏បានគូសបញ្ជាក់អំពីការអំពាវនាវរបស់កម្ពុជា ឲ្យមានកិច្ចឈប់បាញ់គ្នាជាបន្ទាន់ និងគ្មានលក្ខខណ្ឌ ហើយមានដំណោះស្រាយដោយសន្តិវិធី។ នេះជាចំណុចសំខាន់ ដែលមាននៅក្នុងបទអន្តរាគមន៍កម្ពុជា»។

សូមជម្រាបថា ការផ្ទុះអាវុធរវាងកម្ពុជា-ថៃ បានកើតឡើង នៅព្រឹកថ្ងៃទី២៤ ខែកក្កដា ឆ្នាំ២០២៥នេះ នៅចំណុចប្រាសាទតាមាន់ធំ ខេត្តឧត្តរមានជ័យ ដោយបានរាលដាលទៅកាន់ចំណុចផ្សេងៗទៀត នៅតាមបណ្តោយព្រំដែនកម្ពុជា-ថៃ។ ការប្រយុទ្ធគ្នានេះ បានកើតឡើងបន្ទាប់ពីភាគីថៃ បានផ្ទុះអាវុធមុន ដើម្បីឈ្លានពានកម្ពុជា នៅចំណុចប្រាសាទតាមាន់៕