មុនកិច្ចចរចាជាមួយអឺរ៉ុប, អ៊ីរ៉ង់អះអាងថានឹងមិនបោះបង់ចោលការចម្រាញ់សារធាតុអ៊ុយរ៉ាញ៉ូមឡើយ

តេហេរ៉ង់៖ រដ្ឋមន្ត្រីការបរទេសអ៊ីរ៉ង់ លោក Abbas Araghchi បាននិយាយថា អ៊ីរ៉ង់គ្មានផែនការបោះបង់ចោលកម្មវិធីនុយក្លេអ៊ែររបស់ខ្លួន ក្នុងនោះរួមមានទាំងការចម្រាញ់ សារធាតុអ៊ុយរ៉ាញ៉ូមនោះទេ បើទោះជាទីតាំងរោងចក្រនុយក្លេអ៊ែរសំខាន់ៗរបស់ខ្លួនរងការខូចខាតធ្ងន់ធ្ងរដោយសារការទម្លាក់គ្រាប់បែកពីសហរដ្ឋអាមេរិកក៏ដោយ។

លោក Abbas Araghchi ធ្វើការកត់សម្គាល់បែបនេះ មុនអ៊ីរ៉ង់ត្រូវបានបើកកិច្ចចរចានុយក្លេអ៊ែរជាមួយមហាអំណាចអឺរ៉ុបរួមមានចក្រភពអង់គ្លេស បារាំង និងអាល្លឺម៉ង់ ក្នុងទីក្រុងអ៊ីស្ដង់ប៊ុល នៅថ្ងៃសុក្រសប្ដាហ៍នេះ។ កិច្ចប្រជុំនេះនឹងក្លាយជាជំនួបលើកដំបូងចាប់តាំងពីសង្រ្គាម១២ថ្ងៃរវាងអ៊ីរ៉ង់ និងអ៊ីស្រាអែលបិទបញ្ចប់កាលពីខែមិថុនាកន្លងទៅ ដោយក្នុងនោះសហរដ្ឋអាមេរិកបានលូកដៃជួយអ៊ីស្រាអែលទម្លាក់គ្រាប់បែកលើទីតាំងនុយក្លេអ៊ែរអ៊ីរ៉ង់។

ក្នុងបទសម្ភាសន៍ជាមួយទូរទស្សន៍ Fox News កាលពីថ្ងៃចន្ទ ទី២១ ខែកក្កដា លោក Araghchi បានបញ្ជាក់ថា «ក្នុងពេលបច្ចុប្បន្ន ជាការពិតណាស់ ការចម្រាញ់សារធាតុអ៊ុយរ៉ាញ៉ូមត្រូវបានផ្អាក ដោយសារតែរងការខូចខាតធ្ងន់ធ្ងរ។ ប៉ុន្តែ យើងមិនអាចបោះបង់ចោលការចម្រាញ់សារធាតុអ៊ុយរ៉ាញ៉ូមបាននោះទេ ពីព្រោះវាជាសមិទ្ធផលនៃក្រុមអ្នកវិទ្យាសាស្ត្ររបស់យើង»។

សូមជម្រាបថា អ៊ីរ៉ង់ ក៏នឹងត្រូវរៀបចំកិច្ចប្រជុំត្រីភាគីជាមួយចិន និងរុស្ស៉ីផងដែរនៅថ្ងៃអង្គារសប្ដាហ៍នេះ ដើម្បីពិភាក្សាពីបញ្ហានុយក្លេអ៊ែរ និងលទ្ធភាពដែលអឺរ៉ុបអាចនឹងអនុវត្ត ការដាក់ទណ្ឌកម្ម UN ឡើងវិញប្រឆាំងនឹងអ៊ីរ៉ង់៕ (ប្រភព៖ AFP)