សេតវិមានបញ្ជាក់ថា អាមេរិកគ្មានផែនការផ្តល់អាវុធនុយក្លេអ៊ែរ ឱ្យទៅអ៊ុយក្រែនទេ

 ប្រភព៖ Reuters

វ៉ាស៊ីនតោន៖ ទីប្រឹក្សាសន្តិសុខជាតិសេតវិមាន លោក Jake Sullivan បាននិយាយថា សហរដ្ឋអាមេរិក មិនបានពិចារណាប្រគល់អាវុធនុយក្លេអ៊ែរ ដែលអ៊ុយក្រែនបានបោះបង់ ក្រោយការដួលរលំនៃសហភាពសូវៀត ត្រឡប់ទៅវិញឡើយ។

ទីក្រុងកៀវ ធ្លាប់កាន់កាប់អាវុធនុយក្លេអ៊ែរមួយចំនួនធំនៅក្នុងដៃ ក្រោយសហភាពសូវៀត ដួលរលំកាលពីឆ្នាំ១៩៩១ ប៉ុន្តែបានបោះបង់ចោលអាវុធទាំងនោះវិញ ក្រោមកិច្ចព្រមព្រៀងឆ្នាំ១៩៩៤ ជាថ្នូរនឹងការធានាសន្តិសុខពីសំណាក់សហរដ្ឋអាមេរិក ចក្រភពអង់គ្លេស និងរុស្ស៉ី។​

លោក Sullivan បានចេញមុខបញ្ជាក់ដូចខាងលើ នៅពេលត្រូវបានសាកសួរអំពី សេចក្តីរាយការណ៍មួយ កាលពីខែវិច្ឆិកា របស់កាសែតអាមេរិក New York Times ដែលបានអះអាងថា ក្រុមមន្រ្តីលោកខាងលិចមួយចំនួន បានលើកជាយោបល់ថា ប្រធានាធិបតីអាមេរិក លោក ចូ បៃដិន អាចនឹងផ្តល់អាវុធនុយក្លេអ៊ែរឱ្យអ៊ុយក្រែន មុនពេលចាកចេញពីតំណែង នៅខែមករា ឆ្នាំក្រោយ។

លោក Sullivan បានប្រាប់សារព័ត៌មានអាមេរិក ABC ដូច្នេះថា «វាមិនស្ថិតក្រោមការពិចារណាឡើយ គឺអត់មានទេ។ អ្វីដែល​យើងកំពុងតែធ្វើ គឺជួយបង្កើនការផ្តល់សព្វាវុធធម្មតាៗ ប៉ុន្តែចម្រុះប្រភេទឱ្យទៅអ៊ុយក្រែន ដើម្បីឱ្យពួកគេមានសមត្ថភាពការពារខ្លួន ប្រកបដោយប្រសិទ្ធភាព ហើយអាចតតាំងជាមួយរុស្ស៉ី ពោលគឺមិនមែនផ្តល់អាវុធនុយក្លេអ៊ែរ នោះទេ»។

កាលពីសប្តាហ៍មុន ទីក្រុងមូស្គូ បានថ្កោលទោសជាខ្លាំង ចំពោះគំនិតចង់ផ្តល់អាវុធនុយក្លេអ៊ែរបែបនោះ ហើយប្រធានាធិបតីរុស្ស៉ី លោក វ៉្លាឌីមៀ ពូទីន បានព្រមានថា រុស្ស៉ីនឹងប្រើប្រាស់ អាវុធទាំងអស់ដែលខ្លួនមាន ប្រសិនបើអ៊ុយក្រែន ទទួលបានអាវុធនុយក្លេអ៊ែរ៕