លោក Xi Jinping ជួបសន្ទនាជាមួយព្រះអង្គម្ចាស់ Haji Al-Muhtadee Billah ព្រះរជ្ជទាយាទនៃប្រទេស ប្រ៊ុយណេ
បរទេស៖ ព្រឹកថ្ងៃទី ១២ ខែឧសភា នៅវិមានសភាប្រជាជនក្រុងប៉េកាំង លោក Xi Jinping ប្រធានរដ្ឋចិនបានជួបសន្ទនាជាមួយព្រះអង្គម្ចាស់ Haji Al-Muhtadee Billah ព្រះរជ្ជទាយាទនៃប្រទេសប្រ៊ុយណេ ដែលយាងបំពេញព្រះរាជទស្សនកិច្ចជាផ្លូវការនៅប្រទេសចិន ។
ថ្លែងក្នុងកិច្ចជំនួប លោក Xi Jinping បានលើកឡើងថា ឆ្នាំនេះជាខួបទី៣៥នៃការបង្កើតទំនាក់ទំនងការទូតរវាងចិននិងប្រ៊ុយណេ ប្រឈមមុខនឹងពិភពលោកដែលមានភាពស្មុគស្មាញនិងរង្គោះរង្គើខ្លាំង ភាគីយើងទាំងពីរគួរបង្កើនការប្រាស្រ័យទាក់ទងជាយុទ្ធសាស្ត្រ ធ្វើឱ្យស៊ីជម្រៅនូវកិច្ចសហប្រតិបតិ្តការជាក់ស្តែង ដើម្បីបំពេញបន្ថែមកម្លាំងចលករកាន់តែច្រើនសម្រាប់ការរក្សាសន្តិភាពនិងស្ថិរភាពក្នុងតំបន់ ។លោក Xi Jinping បានសង្កត់ធ្ងន់ថា ឆ្នាំនេះជាឆ្នាំដែលប្រទេសចិនចាប់ផ្តើមអនុវត្តផែនការអភិវឌ្ឍន៍ជាតិ៥ឆ្នាំទី១៥ ហើយប្រ៊ុយណេក៏បានធ្វើកិច្ចខិតខំប្រឹងប្រែងដើម្បីឆ្ពោះទៅកាន់ “ចក្ខុវិស័យឆ្នាំ២០៣៥ដ៏អស្ចារ្យ”ផងដែរ ដូច្នេះ ភាគីយើងទាំងពីរគួរចាត់ទុកឆ្នាំនេះជាឱកាសមួយ ដើម្បីជំរុញឱ្យកិច្ចសហប្រតិបតិ្តការរវាងចិននិងប្រ៊ុយណេឡើងដល់កម្រិតថ្មី ។ លោកបានលើកសំណើថា ទីមួយ ត្រូវធ្វើជាដៃគូយុទ្ធសាស្ត្រដែលមានទំនុកចិត្តំពោះគ្នាកម្រិតខ្ពស់ ។ ទីពីរ ត្រូវធ្វើជាដៃគូអភិវឌ្ឍន៍ដែលផ្តល់ផលប្រយោជន៍ដល់គ្នាទៅវិញទៅមកនិងឈ្នះ-ឈ្នះ ។ ទីបី ត្រូវធ្វើជាដៃគូអរិយធម៌ដែលមានការយល់ដឹងគ្នានិងមានភាពស្និទ្ធស្នាល ។ ទីបួន ត្រូវធ្វើជាដៃគូសហប្រតិបតិ្តការក្នុងវិស័យអភិបាលកិច្ចសកល ។
ជាការឆ្លើយតប ព្រះអង្គម្ចាស់ Haji Al-Muhtadee Billah មានព្រះបន្ទូលថា ប្រទេសប្រ៊ុយណេប្រកាន់ខ្ជាប់គោលការណ៍ចិនមួយយ៉ាងម៉ឺងម៉ាត់ មានឆន្ទៈរួមសហការជាមួយប្រទេសចិន ដើម្បីជំរុញកិច្ចកសាងសហគមន៍រួមវាសនាដែលកំណត់ដោយប្រមុខរដ្ឋនៃប្រទេសទាំងពីរ ធ្វើឱ្យទំនាក់ទំនងភាពជាដៃគូសហប្រតិបតិ្តការជាយុទ្ធសាស្ត្រមានភាពកាន់តែស៊ីជម្រៅ ធ្វើឱ្យការប្រាស្រ័យទាក់ទងជាន់ខ្ពស់មានភាពជិតសិ្នទ្ធ ព្រមទាំងបង្កើនកិច្ចសហប្រតិបតិ្តការក្នុងវិស័យពាណិជ្ជកម្មនិងវិនិយោគ ដើម្បីផ្តល់ផលប្រយោជន៍ដល់ប្រជាជននៃប្រទេសទាំងពីរ ៕
Post a Comment