រដ្ឋអាជ្ញាកូរ៉េខាងត្បូង ស្នើឱ្យកាត់ទោសប្រហារជីវិតលោក ​Yoon Suk Yeol ពាក់ព័ន្ធនឹងការប្រើច្បាប់អាជ្ញាសឹក

សេអ៊ូល៖ រដ្ឋអាជ្ញាពិសេសកូរ៉េខាងត្បូងបានស្នើឱ្យតុលាការកាត់ទោសប្រហារជីវិតអតីតប្រធានាធិបតី លោក Yoon Suk Yeol ពាក់ព័ន្ធនឹងបទចោទជាមេគំនិតរៀបចំ ការបះបោរមួយតាមរយៈការប្រកាសប្រើច្បាប់អាជ្ញាសឹកកាលពីខែធ្នូ ឆ្នាំ២០២៤។

នៅក្នុងសវនាការមួយនៅឯតុលាការ Seoul Central District កាលពីថ្ងៃអង្គារ ទី១៣ ខែមករា រដ្ឋអាជ្ញាម្នាក់បាននិយាយថា ក្រុមអ្នកស៊ើបអង្កេតបានរកឃើញថាពិតជាមានការរៀបចំផែនការមួយតាមបញ្ជាដោយផ្ទាល់របស់លោក Yoon និងអតីតរដ្ឋមន្ត្រីការពារជាតិរបស់លោក គឺលោក Kim Yong-hyun ចុះកាលបរិច្ឆេទកាលពីខែតុលា ឆ្នាំ២០២៣ ដើម្បីរក្សាអំណាចរបស់លោក Yoon។

រដ្ឋអាជ្ញារូបនោះបានកត់សម្គាល់ដូច្នេះថា «លោក Yoon...បានអះអាងថាការដាក់ចេញច្បាប់អាជ្ញាសឹក គឺដើម្បីការពារប្រជាធិបតេយ្យសេរី ប៉ុន្តែទង្វើផ្ទុយពីរដ្ឋធម្មនុញ្ញ និង ការប្រកាសប្រើច្បាប់អាជ្ញាសឹកដោយខុសច្បាប់របស់លោកបានបំផ្លាញដំណើរការនៃរដ្ឋសភា និងគណៈកម្មការរៀបចំការបោះឆ្នោត...ព្រមទាំងបំផ្លាញប្រជាធិបតេយ្យសេរី នៅក្រោមច្បាប់រដ្ឋធម្មនុញ»។ រដ្ឋអាជ្ញាដដែលបន្ថែមថា លោក Yoon មិនបានបង្ហាញការសោកស្ដោយដោយស្មោះត្រង់នោះទេ ហើយក៏មិនបានធ្វើការសូមទោសទៅកាន់ ប្រជាជនកូរ៉េខាងត្បូងទាំងមូលនោះដែរ។

សូមជម្រាបថា លោក Yoon មានអាយុ៦៥ឆ្នាំ បានច្រានចោលការចោទប្រកាន់ប្រឆាំងនឹងរូបលោក។ លោកត្រូវបានទីភ្នាក់ងារសារព័ត៌មាន​ Yonhap ដកស្រង់សម្ដីដោយ បាននិយាយថាការដែលលោកប្រកាសដាក់ច្បាប់អាជ្ញាសឹក មានគោលបំណងទប់ស្កាត់កុំឱ្យក្រុមមនុស្សទុច្ចរិតបំផ្លាញប្រទេសជាតិ ហើយថាការប្រកាសប្រើច្បាប់អាជ្ញាសឹកធ្វើឡើង ក្រោមក្របខណ្ឌនៃអំណាចជាប្រធានាធិបតីដែលច្បាប់បានអនុញ្ញាត។ តុលាការគ្រោងនឹងប្រកាសសាលក្រមលើសំណុំរឿងរបស់លោក Yoon នៅថ្ងៃទី១៩ ខែកុម្ភៈខាងមុខ។

គួរបញ្ជាក់ថា កូរ៉េខាងត្បូងមិនធ្លាប់បានអនុវត្តការកាត់ទោសប្រហារជីវិតនោះទេ​ក្នុងពេលជិត ៣ទសវត្សរ៍មកនេះ៕