រដ្ឋបាលលោក ត្រាំ កំណត់ពេលជួបក្រុមហ៊ុនប្រេងយក្សអាមេរិក ដើម្បីពិភាក្សាការផលិតនៅវេណេស៊ុយអេឡា

វ៉ាស៊ីនតោន៖ ប្រភពបានបង្ហើបឱ្យដឹងថា រដ្ឋបាលរបស់ប្រធានាធិបតី ដូណាល់ ត្រាំ គ្រោងនឹងជួបប្រជុំជាមួយនាយកប្រតិបត្តិនៃក្រុមហ៊ុនប្រេងអាមេរិកនៅចុងសប្តាហ៍នេះ ដើម្បីពិភាក្សាអំពីការបង្កើនការផលិតប្រេងនៅវេណេស៊ុយអេឡា បន្ទាប់ពីកងកម្លាំងអាមេរិកបានទម្លាក់លោក នីកូឡាស់ ម៉ាឌូរ៉ូ។

គោលបំណងសំខាន់គឺដើម្បីនាំយកក្រុមហ៊ុនប្រេងយក្សអាមេរិក ដូចជា Exxon Mobil, ConocoPhillips និង Chevron ត្រឡប់ចូលទៅក្នុងប្រទេសសមាជិក OPEC មួយនេះវិញ ដែលមានប្រេងបម្រុងធំជាងគេលើពិភពលោក។

ទោះជាយ៉ាងណា ប្រភពពីឧស្សាហកម្មប្រេងចំនួនបួនបានបដិសេធការអះអាងរបស់លោក ត្រាំ ដែលថាបានជួបពួកគេរួចហើយ ដោយបញ្ជាក់ថា មកទល់ពេលនេះមិនទាន់មានការពិភាក្សាណាមួយជាមួយសេតវិមានអំពីប្រតិបត្តិការនៅវេណេស៊ុយអេឡានោះទេ។

អ្នកនាំពាក្យសេតវិមានបានអះអាងថា ក្រុមហ៊ុនប្រេងទាំងអស់ត្រៀមខ្លួនរួចរាល់ហើយក្នុងការវិនិយោគដើម្បីកសាងហេដ្ឋារចនាសម្ព័ន្ធប្រេងឡើងវិញ។ លោក ត្រាំ ថែមទាំងបានបង្ហើបថា អាមេរិកអាចនឹងផ្តល់ការឧបត្ថម្ភធនដល់ក្រុមហ៊ុនទាំងនោះទៀតផង។ យោងតាម CBS News នាយកប្រតិបត្តិក្រុមហ៊ុនទាំងបីត្រូវបានគេរំពឹងថានឹងជួបជាមួយរដ្ឋមន្ត្រីក្រសួងថាមពល លោក គ្រីស រ៉ាយ (Chris Wright) នៅថ្ងៃព្រហស្បតិ៍នេះ៕ (Reuters)