ហាម៉ាស ជ្រើសរើសមេដឹកនាំថ្មី ចំពោះមុខការជំរុញឱ្យរំសាយអាវុធ

ហ្កាហ្សា៖ ហាម៉ាស ត្រូវបានគេរំពឹងថាបោះឆ្នោតរកមេដឹកនាំថ្មី នៅក្នុងខែមករានេះ ដោយប្រភពចំនួនពីរនៅក្នុងក្រុម បានប្រាប់ Reuters ថាគឺដើម្បីបំពេញតួនាទីទំនេរ ចាប់តាំងពីអ៊ីស្រាអែលសម្លាប់អតីតមេដឹកនាំ លោក Yahya Sinwar ក្នុងឆ្នាំ ២០២៤ ទោះបីជាបារម្ភថាអ្នកកាន់តំណែងក្រោយ អាចមានជោគវាសនាដូចគ្នាក៏ដោយ។

លោក Khalil Al-Hayya និងលោក Khaled Meshaal ត្រូវបានគេមើលឃើញថា ជាអ្នកនាំមុខសម្រាប់តួនាទីដ៏សំខាន់ ក្នុងក្រុមសកម្មប្រយុទ្ធមួយនេះ។ អ្នកទាំងពីររស់នៅប្រទេសកាតា ហើយស្ថិតក្នុងចំណោមក្រុមប្រឹក្សា ៥នាក់ដែលគ្រប់គ្រងហាម៉ាស ចាប់តាំងពីការសម្លាប់លោក Sinwar ដែលជាមេគំនិតនៃការវាយប្រហារថ្ងៃទី៧ ខែតុលា ឆ្នាំ ២០២៣ លើទឹកដីអ៊ីស្រាអែល។

ប្រភពដដែល​បន្ត​ថា ដំណើរការ​ជ្រើសរើសបាន​ចាប់​ផ្តើម​ហើយ​។ មេដឹកនាំមួយរូប ត្រូវជ្រើសរើសក្នុងការបោះឆ្នោតសម្ងាត់ ដោយក្រុមប្រឹក្សា Shoura របស់ហាម៉ាស ដែលជាស្ថាប័នមានសមាជិក ៥០នាក់ រស់នៅក្នុងតំបន់ West Bank ហ្កាហ្សា និងខ្លះទៀតនិរទេសខ្លួន។ អ្នកនាំពាក្យរបស់ហាម៉ាស បានបដិសេធធ្វើអត្ថាធិប្បាយ។

សូមជម្រាបថា អ្នកកាន់តំណែងមេដឹកនាំហាម៉ាសមុន លោក Sinwar គឺលោក Ismail Haniyeh ក៏ត្រូវបានធ្វើឃាតដោយអ៊ីស្រាអែលផងដែរ។ ក្រោយធ្វើសង្រ្គាមអស់រយៈពេលពីរឆ្នាំ ជាមួយអ៉ីស្រាអែលនៅហ្កាហ្សា ក្រុមនេះកំពុងប្រឈមនឹងការទាមទារពីអន្តរជាតិឱ្យរំសាយអាវុធ៕