មន្ទីរ​រៀបចំដែ​ន​ដីខេត្តមណ្ឌលគិរីនាំយកវិញ្ញាបនបត្រ​សម្គាល់​ម្ចាស់​អចលនវត្ថុ​ (ព្រះរាជទ្រព្យ​)​ ប្រគល់​ជូនក្រ​សួ​ង​ព្រះ​មររាជវាំង

 អត្ថបទ៖ ជឹម ទូច

ខេត្តមណ្ឌលគិរី ៖ មន្ទីរ​រៀបចំដែ​ន​ដី​​ នគរូបនីយកម្ម​ សំណង់​ និងសុរិយោ​ដី​ខេត្តមណ្ឌលគិរី​ កាលពីសប្តាហ៍ទីមួយនៃខែតុលា ឆ្នាំ២០២៥នេះ បាននាំយកវិញ្ញាបនបត្រ​សម្គាល់​ម្ចាស់​អចលនវត្ថុ​ (ព្រះរាជទ្រព្យ​)​ ប្រគល់​ជូនក្រ​សួ​ង​ព្រះ​មររាជវាំង​។

លោក លឹម​ ចាន់សូភី​ ប្រធានមន្ទីរ​រៀបចំដែនដី​ នគរូបនីយកម្ម​ សំណង់​ និងសុរិយោដី​ ខេត្តបានឲ្យដឹងនៅព្រឹកថ្ងៃទី៦ ខែតុលា ឆ្នាំ២០២៥ ថា នៅទូទាំងខេត្តមណ្ឌលគិរី មានដីព្រះរាជទ្រព្យតែមួយកន្លែងប៉ុណ្ណោះ ដែលមានទំហំ៥២ ០៧៨ម៉ែត្រការ៉េ ឬស្មើនិង ជាងប្រាំហិកតា ស្ថិត​នៅភូមិ​ជ្រៃ​សែន​ សង្កាត់មនោរម្យ​ ក្រុងសែនមនោរម្យ ដើម្បីប្រគល់ជូនក្រសួង​ព្រះ​មររាជវាំង​ ។

ជុំវិញដីរបស់រាជវាំងខាងលើនេះលោក នាង វណ្ណៈ នាយករដ្ឋបាលសាលាខេត្ត និងជាអ្នកនាំពាក្យសាលាខេត្តមណ្ឌលគិរី បានថ្លែងបញ្ជាក់​​នា​ព្រឹកថ្ងៃទី៦ ខែកក្កដា ថា ទាក់ទិនដីព្រះរាជទ្រព្យនេះ ខាងរដ្ឋបាលខេត្តក៏មិនទាន់បានដឹងច្បាស់អំពីការអភិវឌ្ឍអ្វីដែរ ។ ប៉ុន្តែគ្រាន់ថា រាជ​វាំង​ក៏ដូចជាក្រសួងមួយដែរ គឺក្រសួងព្រះបរមរាជវាំង អ៊ីចឹងហើយជាធម្មតាក្រសួងឬព្រះរាជវាំងតែងតែមាន​សារពើភណ្ឌរ​បស់ខ្លួ​ន ទោះបី​ជាមិនមានការអភិវឌ្ឍ ឬមានការអភិវឌ្ឍអ្វីនោះគឺក្រសួងព្រះបរមរាជវាំងគាត់ អាចចុះបញ្ជីជាទ្រព្យសម្បត្តិរប​​ស់ព្រះបរមរាជវាំងបា​ន។

អ្នកនាំពាក្យបានបន្តថា ការអភិវឌ្ឍអ្វីផ្សេងៗហ្នឹងជាផែនការ ឬក៏ជាការគិតគូរ ការរៀបចំនៃ​ព្រះបរមរាជវាំង អ៊ី​ចឹង!យើងហើ​យយើង​ជាអា​ជ្ញា​ធរខេត្ត ក៏អត់ទាន់បានទទួលព័ត៌មានពីព្រះបរមរាជវាំងថា តើព្រះបរមរាជវាំងនិងមានផែនការអភិវឌ្ឍន៍ធ្វើអីឬយ៉ាងណានោះទេ?

ដូច្នេះអាជ្ញាធរបានត្រឹម រៀបចំការចុះបញ្ជីដីជាទ្រព្យសម្បត្តិនៃព្រះបរមរាជរាំង តែយើងដែលជាថ្នាក់ខេត្តទាំងអស់ និងរង់ចាំទទួល បទបញ្ជា ក៏ដូចជាការសហការ និងការសម្រុះសម្រួល ប្រសិនបើមានការអភិវឌ្ឍអីមួយនៅក្នុងដីរបស់ព្រះបរមរាជវាំងខាងលើនេះ ។

យោងតាមប្រវត្តិនៃដីព្រះរាជដំណាក់ចាស់របស់សម្តេចឪ ដែលកោះសន្តិភាពស្រាវជ្រាវបានឯកសារនានា និងប្រភពរដ្ឋបាលខេត្តម​ណ្ឌ​ល​គិរី បានឲ្យដឹងថា ប្រវត្តិដីអតីតព្រះរាជ​ដំ​ណាក់របស់សម្ដេចព្រះនរោត្តម សីហនុ នៅក្នុងខេត្តមណ្ឌលគិរី គឺពិតជាមានសារៈសំខាន់ណាស់ ព្រោះវាភ្ជាប់ទៅ​នឹងប្រវត្តិ​សាស្ត្រ​នៃការកកើតខេត្តនេះតែម្ដង។

ព្រះរាជដំណាក់នេះត្រូវបានកសាងឡើងនៅក្នុងអំឡុង សម័យសង្គមរាស្ត្រនិយម (ឆ្នាំ១៩៥៥-១៩៧០) ដែលជាសម័យកាល​ដែលព្រះបា​ទ​​ស​ម្ដេចព្រះនរោត្ដម សីហនុ (ព្រះបរមរតនកោដ្ឋ) បានដឹកនាំប្រទេស។ហើយខេត្តមណ្ឌលគិរីត្រូវបានបង្កើតឡើងនៅក្នុង ឆ្នាំ១៩៦១ ក្រោមព្រះរាជកិច្ចដឹកនាំរបស់ព្រះអង្គផ្ទាល់។ ការកសាងព្រះរាជដំណាក់ គឺដើម្បីបម្រើជាទីកន្លែងសម្រាប់ព្រះអង្គយាងគង់ប្រថាប់ និងសម្រាកលំហែកាយ នៅពេលដែលព្រះអង្គយាងចុះត្រួតពិនិត្យការងារ និងអភិវឌ្ឍន៍ខេត្តដែលទើបបង្កើតថ្មីមួយនេះ។

ស្ថានភាពបច្ចុប្បន្ន អគារព្រះរាជដំណាក់ដើម មិនមានរូបរាងពេញលេញដូចដើមទៀតទេ នៅសល់ត្រឹមតែ គ្រឹះបន្តិចបន្តួចប៉ុណ្ណោះ ដោ​យ​សារតែការបោះបង់ចោល ការខ្វះការថែទាំក្នុងសម័យសង្គ្រាម និងការលុកលុយរបស់ព្រៃឈើ និងរុក្ខជាតិ។ ​ទីតាំង​នេះបា​នក្លា​យ​ទៅជា​ទីតាំង​ប្រវត្តិសាស្ត្រមួយដែលបង្ហាញពីស្នាព្រះហស្តរបស់ព្រះបរមរតនកោដ្ឋ ក្នុងការបង្កើតនិងអភិវឌ្ឍន៍ខេត្តភាគឦសាននេះ។

ព្រះរាជដំណាក់នៅមណ្ឌលគិរីនេះ គឺជាផ្នែកមួយនៃបណ្ដាព្រះរាជដំណាក់ជាច្រើនដែលព្រះបាទសម្ដេចព្រះនរោត្តម សីហនុ បានកសាង​ឡើង​នៅតាមបណ្ដាខេត្តនានាទូទាំងប្រទេសកម្ពុជា ដើម្បីបង្ហាញពីវត្តមានរបស់ព្រះមហាក្សត្រ និងដើម្បីជំរុញការអ​ភិវឌ្ឍនៅតា​មតំបន់​ដាច់​ស្រយាល ៕