កូរ៉េខាងត្បូង ជប៉ុន និងអាមេរិក ធ្វើសមយុទ្ធផ្លូវអាកាសរួមគ្នា

 ប្រភព៖ Reuters

សេអ៊ូល៖ ក្រសួងការពារជាតិកូរ៉េខាងត្បូង បានឱ្យដឹងថា នៅថ្ងៃសុក្រ ទី១១ ខែកក្កដា កូរ៉េខាងត្បូង ជប៉ុន និងសហរដ្ឋអាមេរិក បានធ្វើសមយុទ្ធផ្លូវអាកាសរួមគ្នា នៅលើដែនទឹកអន្តរជាតិ ដោយមានការប្រើប្រាស់យន្តហោះទម្លាក់គ្រាប់បែកអាមេរិក B-52 ១គ្រឿង ព្រមទាំងយន្តហោះចម្បាំងផ្សេងៗ។

ក្នុងថ្ងៃដដែលនេះ មន្រ្តីយោធាកំពូលនៃប្រទេសទាំង៣ ក៏បានបើកកិច្ចប្រជុំប្រចាំឆ្នាំនៅទីក្រុងសេអ៊ូលផងដែរ ជាទីដែលពួកគេទទួលស្គាល់ សារសំខាន់នៃកិច្ចសហប្រតិបត្តិត្រីភាគីជិតស្និទ្ធ ក្នុងការដោះស្រាយបញ្ហាប្រឈមផ្នែកសន្តិសុខ ពាក់ព័ន្ធជាមួយប្រទេសកូរ៉េខាងជើង នៅក្នុងតំបន់ឥណ្ឌូ-ប៉ាស៊ីហ្វិក និងកន្លែងផ្សេងទៀត។

អំឡុងសុន្ទរកថាបើកកិច្ចប្រជុំខាងលើ ប្រធានអគ្គសេនាធិការចម្រុះនៃយោធាអាមេរិក លោកឧត្តមសេនីយ៍ Dan Caine បាននិយាយដូច្នេះថា «យើងកំពុងបំភ្លឺគន្លងផ្លូវអនាគតរួមគ្នា ដែលជាផ្លូវមួយភាពជាដៃគូអាចវិវត្តទៅមុខ ពីការកសាងសមត្ថភាព ទៅជាការចែករំលែកទទួលខុសត្រូវ តាមរយៈការធ្វើប្រាស្រ័យទាក់ទងឋិតថេរជាប់លាប់»។ លោក Caine បានបន្តថា «កូរ៉េខាងជើងនិងចិន កំពុងឆ្លងកាត់ការកសាងកម្លាំងយោធាមិនធ្លាប់ឃើញពីមុនមក ជាមួយចេតច្បាស់លាស់ ដើម្បីជំរុញគោលដៅរបស់ពួកគេ»៕