ស៊ីរី និងលីបង់ ប៉ះទង្គិចគ្នានៅតាមព្រំដែន បង្កើនភាពតានតឹងក្នុងតំបន់

 ប្រភព៖ Reuters

លីបង់៖ កងទ័ពស៊ីរីបានប៉ះទង្គិចគ្នាជាមួយកងទ័ពលីបង់ និងក្រុមប្រដាប់អាវុធនៅតាមបណ្តោយព្រំដែនភាគឦសាននៃប្រទេសលីបង់ពេញមួយយប់រហូតដល់ថ្ងៃចន្ទ ដែលជាឧប្បត្តិហេតុចុងក្រោយបង្អស់នៃភាពតានតឹងដែលកំពុងកើនឡើងនៅក្នុងតំបន់។

ភាពតានតឹងបានកើនឡើងនៅពេលដែលក្រសួងការពារជាតិស៊ីរីកាលពីល្ងាចថ្ងៃអាទិត្យបានចោទប្រកាន់ក្រុម Hezbollah ថា បានរំលោភចូលទឹកដីស៊ីរី ចាប់ពង្រត់ និងសម្លាប់ទាហានស៊ីរីបីនាក់។ ទោះជាយ៉ាងណាក៏ដោយ ក្រុម Hezbollah បានបដិសេធការជាប់ពាក់ព័ន្ធនៅក្នុងហេតុការណ៍នេះ។

ប្រភពសន្តិសុខលីបង់បានផ្តល់ព័ត៌មានផ្ទុយគ្នា ដោយបានប្រាប់ថា ទាហានស៊ីរីបីនាក់ជាអ្នកដែលបានឆ្លងចូលទៅក្នុងទឹកដីលីបង់ជាមុន ហើយត្រូវបានសម្លាប់ដោយសមាជិកប្រដាប់អាវុធនៃកុលសម្ព័ន្ធមួយនៅភាគឦសានប្រទេសលីបង់ ដោយសារតែការភ័យខ្លាចនៃការវាយប្រហារលើទីក្រុងរបស់ពួកគេ។

ជាការសងសឹកចំពោះការស្លាប់របស់ទាហានស៊ីរីទាំងនោះ កងទ័ពស៊ីរីបានបាញ់ផ្លោងទៅលើទីក្រុងព្រំដែនលីបង់ពេញមួយយប់ ដែលត្រូវបានបញ្ជាក់ដោយទាំងក្រសួងការពារជាតិស៊ីរី និងកងទ័ពលីបង់។ អ្នកស្រុកនៃទីក្រុង Al-Qasr ដែលស្ថិតនៅជិតព្រំដែន បានរាយការណ៍ថា ពួកគេបានភៀសខ្លួនចេញពីតំបន់នោះដើម្បីសុវត្ថិភាពពីការបាញ់ផ្លោង។

កងទ័ពលីបង់បានចេញសេចក្តីថ្លែងការណ៍នៅថ្ងៃចន្ទ ដោយបញ្ជាក់ថា ពួកគេបានប្រគល់សាកសពទាហានស៊ីរីទាំងបីនាក់ទៅឱ្យអាជ្ញាធរស៊ីរីវិញ និងបានអះអាងថា ពួកគេបានឆ្លើយតបនឹងការបាញ់ចេញពីទឹកដីស៊ីរី ដោយបានបញ្ជូនកងកម្លាំងបន្ថែមទៅកាន់តំបន់ព្រំដែនដើម្បីពង្រឹងសន្តិសុខ។ ហេតុការណ៍នេះបានបង្កើនការព្រួយបារម្ភអំពីការកើនឡើងបន្ថែមទៀតនៃអំពើហិង្សានៅក្នុងតំបន់ដែលងាយរងគ្រោះនេះ៕