ព្យុះស៊ីក្លូន Fengal វាយប្រហារឥណ្ឌា និងស្រីលង្កា បណ្តាលឱ្យមនុស្សស្លាប់១៩នាក់

 ប្រភព៖ Reuters

កូឡុំបូ៖ ព្យុះស៊ីក្លូន Fengal បានវាយប្រហារឆ្នេរសមុទ្រភាគខាងត្បូង នៃប្រទេសឥណ្ឌា កាលពីថ្ងៃសៅរ៍ ដែលបណ្តាលឱ្យមនុស្សស្លាប់យ៉ាងហោចណាស់ ១៩នាក់នៅក្នុងប្រទេសឥណ្ឌា និងស្រីលង្កា។

ព្យុះនេះបាននាំមកនូវភ្លៀងធ្លាក់ខ្លាំង និងខ្យល់បក់ខ្លាំង ដែលបណ្តាលឱ្យមានទឹកជំនន់នៅក្នុងរដ្ឋ Tamil Nadu និងតំបន់ជាឆ្នេររបស់ឥណ្ឌា Puducherry។

ការិយាល័យអាកាសធាតុរបស់ប្រទេសឥណ្ឌា បានប្រកាសនៅលើប្រព័ន្ធផ្សព្វផ្សាយសង្គមនៅថ្ងៃអាទិត្យនេះថា ទីក្រុង Puducherry ត្រូវបានវាយប្រហារដោយភ្លៀងធ្លាក់ខ្លាំងបំផុតមិនធ្លាប់មាន ក្នុងរយៈពេល ៣០ឆ្នាំ។ ទឹកជំនន់ក៏បានប៉ះពាល់ដល់ទីក្រុង Chennai ដែលជាទីក្រុងធំមួយ នៅភាគខាងត្បូងប្រទេសឥណ្ឌាផងដែរ។ អាជ្ញាធរបានផ្អាកជើងហោះហើរនៅអាកាសយានដ្ឋាន Chennai ជាបណ្តោះអាសន្ន។

នៅឯប្រទេសស្រីលង្កា មានមនុស្ស ១៦នាក់បានស្លាប់ និងប្រជាជនរាប់ពាន់នាក់ ត្រូវបានជម្លៀសចេញដោយសារទឹកជំនន់។ ក្រុមអ្នកសង្គ្រោះកំពុងប្រឹងប្រែងជួយសង្រ្គោះប្រជាជន និងផ្តល់ជំនួយ ដល់អ្នកដែលរងផលប៉ះពាល់ ដោយគ្រោះមហន្តរាយនេះ៕