អាមេរិក ជួយពលរដ្ឋរងគ្រោះដោយសារសង្គ្រាមឈ្លានពានរបស់ថៃ នៅខេត្តឧត្តរមានជ័យ

ភ្នំពេញ៖ រដ្ឋាភិបាលអាមេរិក បានយកចិត្តទុកដាក់ចំពោះផលប៉ះពាល់ និងការរងគ្រោះចំពោះជីវភាព និង​លំនៅ​ឋានរបស់​ប្រជា​ពលរដ្ឋខ្មែរបណ្តាលមកពីសង្គ្រាមឈ្លានពានរបស់ថៃនៅតាមទល់ដែន​របស់​ខ្មែរ។

អង្គការអន្តរជាតិទេសន្តរប្រវេសន៍ ដែលធ្វើសកម្មភាពក្រោមជំនួយរបស់រដ្ឋាភិបាលអាមេរិក បាន​បញ្ជាក់ថា ការកែលម្អលំនៅឋាន និងការគាំទ្រដល់ការស្តារឡើងវិញនូវ​បរិយាកាសរស់​នៅរបស់​ប្រជាពល​រដ្ឋខ្មែរឱ្យមានសុវត្ថិភាព និងសេចក្តីថ្លៃថ្នូរ ជាពិសេសសម្រាប់គ្រួសារដែលផ្ទះសម្បែង​រងផលប៉ះពាល់ដោយសារជម្លោះព្រំដែន បានបន្តទៅដល់ខេត្តឧត្តរមានជ័យហើយ។

អង្គការអន្តរជាតិទេសន្តរប្រវេសន៍បន្តថា តាមរយៈការគាំទ្រពីរដ្ឋាភិបាលអាមេរិក ស្ថានទូតអាមេរិ​ក​ប្រចាំនៅកម្ពុជា មានគ្រួសារ ២៣៩គ្រួសារបន្ថែមទៀត ក្នុងខេត្តឧត្តរមានជ័យ ទទួលបានសម្ភារ​ជួស​ជុលជម្រក ដើម្បីជួយពួកគេសាងសង់ និងជួសជុលផ្ទះសម្បែង និងចូលរួមស្តារជីវភាព​ឡើង​វិញ​ដោយសេចក្តីថ្លៃថ្នូរ។

អង្គការអន្តរជាតិទេសន្តរប្រវេសន៍ បានឱ្យដឹងថា បន្ទាប់ពីខេត្តឧត្តរមានជ័យ ដំណាក់កាលបន្ទាប់​នៃ​ការ​បែងចែក​កញ្ចប់​សម្ភារ​ជួសជុលជម្រក នឹងទៅដល់ខេត្តបន្ទាយមានជ័យ ដែលក្នុងនោះមាន​គ្រួសារបន្ថែមប្រមាណជា ៧០០ ទៅ ៨០០គ្រួសារ រំពឹងថានឹងទទួលបានការគាំទ្រនេះ។

អង្គការអន្តរជាតិទេសន្តរប្រវេសន៍ (IOM) បានបញ្ជាក់ថា ខ្លួននៅតែបន្តប្តេជ្ញាចិត្តក្នុងការ​គាំទ្រដល់​សហគមន៍ដែលរងផលប៉ះពាល់ និងដល់ការស្តារឡើងវិញក្នុងដំណាក់កាលដំបូង ដើម្បីជួយ​ដល់​ក្រុមគ្រួសាររងផលប៉ះពាល់ក្នុងការកសាងជីវភាពរបស់ពួកគេឡើងវិញ ប្រកបដោយសុវត្ថិភាព និងសេចក្តីថ្លៃថ្នូរ៕