រុស្ស៉ី អះអាងថាអ៊ុយក្រែន ប្រើដ្រូនវាយប្រហារលើរដ្ឋធានីមូស្គូ

 ប្រភព៖ AFP

មូស្គូ៖ អាជ្ញាធររុស្ស៉ី បានឱ្យដឹងថាអ៊ុយក្រែនបានបើកការវាយប្រហារដោយប្រើដ្រូនកំណត់គោលដៅលើរដ្ឋធានីមូស្គូ ដោយបង្ខំឱ្យអាជ្ញាធរបិទអាកាសយានដ្ឋានដ៏សំខាន់ចំនួន២ នៃរដ្ឋធានី។

ចៅហ្វាយក្រុងមូស្គូ លោក Sergei Sobyanin ក្នុងការបង្ហោះមួយលើ Telegram ថាប្រព័ន្ធការពារដែនអាកាសរុស្ស៉ីបានកម្ទេចដ្រូនអ៊ុយក្រែន ៩គ្រឿង ដែលហោះសំដៅឆ្ពោះទៅរករដ្ឋធានីមូស្គូ នៅព្រឹកថ្ងៃអាទិត្យនេះ។ លោកបន្ថែមថាមន្ត្រីសង្រ្គោះបន្ទាន់ត្រូវបានបញ្ជូនទៅកាន់ទីតាំងកើតហេតុ ជាទីដែលបំណែកដ្រូនបានធ្លាក់។ ប៉ុន្តែលោកមិនបានបញ្ជាក់ថាតើមានអ្នករងរបួស ឬការខូចខាតនោះទេ។

បើតាមអាជ្ញាធរអាកាសចរណ៍ស៊ីវិលរុស្ស៉ី ដើម្បីធានាសុវត្ថិភាពហោះហើរ ខ្លួនបានសម្រេចចិត្តបិទអាកាសយានដ្ឋាន Vnukovo និង Domodedovo មួយរយៈពេលខ្លី។ រុស្ស៉ី និងអ៊ុយក្រែន មួយរយៈពេលចុងក្រោយនេះបានបង្កើនការវាយប្រហារដោយប្រើដ្រូនទៅវិញទៅមក ខណៈកិច្ចចរចានៅតែមិនទាន់អាចសម្រេចបានបទឈប់បាញ់នៅឡើយទេ៕