អឺរ៉ុប និងកាណាដា ត្រៀមវិធានការវាយបកយ៉ាងខ្លាំងក្លា ក្រោយអមេរិកដំឡើងពន្ធលើការនាំចូលដែក-អាលុយមីញ៉ូម

 ប្រភព៖ Reuters

ប្រ៊ុចសែល៖ សហភាពអឺរ៉ុប (EU) និងកាណាដា បានប្រកាសពីការត្រៀមវិធានការតបតយ៉ាងខ្លាំងក្លា ក្រោយប្រធានាធិបតីអាមេរិក ដូណាល់ ត្រាំ បានប្រកាសដំឡើងពន្ធលើការនាំចូលដែកនិងអាលុយមីញ៉ូមទាំងអស់ ដែលវិធានការថ្មីនេះនឹងចូលជាធរមាននៅថ្ងៃទី៤ ខែមីនា។

ប្រធានគណៈកម្មការអឺរ៉ុបលោកស្រី Ursula von der Leyen បានថ្កោលទោសការសម្រេចចិត្តរបស់សហរដ្ឋអាមេរិក ដោយព្រមានពីប្រតិកម្មតបតយ៉ាងខ្លាំងនិងសមាមាត្រ ពីសំណាក់សហភាពអឺរ៉ុប។ ជម្រើសមួយក្នុងចំណោមជម្រើសទាំងនោះ គឺការដាក់ឱ្យដំណើរការឡើងវិញនូវពន្ធគយលើផលិតផលអាមេរិក ដែលធ្លាប់ត្រូវបានផ្អាកក្រោមកិច្ចព្រមព្រៀង រវាងភាគីទាំងពីរ កាលពីរដ្ឋបាលមុនៗ។

ដោយឡែក នាយករដ្ឋមន្ត្រីកាណាដា លោក Justin Trudeau បានហៅពន្ធថ្មីនេះថា «មិនអាចទទួលយកបាន» និងបានប្តេជ្ញាថា កាណាដានឹងឆ្លើយតបយ៉ាងរឹងមាំ ប្រសិនបើចាំបាច់។ កាណាដាគឺជាអ្នកផ្គត់ផ្គង់ដែកនិងអាលុយមីញ៉ូមដ៏ធំបំផុតរបស់សហរដ្ឋអាមេរិក។

លោក ត្រាំ បានអះអាងថា ការដំឡើងពន្ធលើដែកនិងអាលុយមីញ៉ូមដល់ ២៥% ដោយ គ្មានការលើកលែងនេះ នឹងធ្វើឱ្យអត្រាពន្ធ «កាន់តែច្បាស់លាស់សម្រាប់ទាំងអស់គ្នា» ដោយ​អនុវត្តលើប្រទេសនានា មិនថានាំចូលមកពីប្រទេសណាឡើយ។ លើសពីនេះ លោក បានគំរាមដាក់ពន្ធលើផលិតផលផ្សេងទៀត រួមមានរថយន្ត គ្រឿងអេឡិចត្រូនិក និងឱសថ ព្រមទាំង «ពន្ធសងសឹក» ចំពោះប្រទេសណាដែលដាក់ពន្ធលើទំនិញរបស់ សហរដ្ឋអាមេរិក។

ក្រៅពីដំឡើងពន្ធ លោក ត្រាំ ក៏គ្រោងនឹងអនុវត្តស្តង់ដារថ្មីមួយទៀត លើដែក និងអាលុយមីញ៉ូម។ ស្តង់ដារនេះតម្រូវឱ្យដែកត្រូវឆ្លងកាត់ដំណើរការ «រំលាយនិងចាក់» ដោយចាប់ផ្តើមពីវត្ថុធាតុដើមរហូតដល់ចេញជាដុំ នៅក្នុងអាមេរិកខាងជើង។ ចំពោះអាលុយមីញ៉ូមវិញ ក៏ត្រូវឆ្លងកាត់ដំណើរការ «រំលាយនិងបោះ» ​នៅក្នុងអាមេរិកខាងជើងដូចគ្នាផងដែរ។ វិធានការនេះគឺដើម្បីទប់ស្កាត់ការនាំចូលលោហៈ ដែលគ្រាន់តែកែច្នៃបន្តិចបន្តួចពីចិននិងរុស្ស៊ី៕