មនុស្សស្លាប់កើនដល់៥៣នាក់ និងរបួស៦២នាក់ ក្រោយគ្រោះរញ្ជួយដីវាយប្រហារតំបន់ទីបេ

 ប្រភព៖ AFP

ប៉េកាំង៖ នាព្រឹកថ្ងៃអង្គារ ទី៧ ខែមករានេះ គ្រោះរញ្ជួយដីកម្រិតធ្ងន់មួយ បានកើតមានឡើង នៅឯតំបន់ទីបេ (Tibet) នៃប្រទេសចិន និងបានផ្តាច់ជីវិតមនុស្សកើនដល់យ៉ាងហោច ៥៣នាក់។

មជ្ឈមណ្ឌលតាមដានគ្រោះរញ្ជួយដីនៃប្រទេសចិន CENC បានរាយការណ៍ថា គ្រោះរញ្ជួយដីមួយមានកម្រិត ៦.៨រ៉ិចទ័រ បានអង្រួន​ស្រុក Dingri នៃតំបន់ Tibet កៀកនឹងព្រំប្រទល់ ជាមួយប្រទេសនេប៉ាល់ កាលពីវេលាម៉ោង៩៖០៥នាទីព្រឹក (ម៉ោងនៅក្នុងតំបន់) និងមានជម្រៅ១០គីឡូម៉ែត្រ ខណៈទីភ្នាក់ងារអាមេរិក USGA បានរាយការណ៍ថា គ្រោះរញ្ជួយដីនោះ មានកម្រិត៧.១រ៉ិចទ័រ។

ទីភ្នាក់ងារព័ត៌មានចិន Xinhua ដោយផ្អែកលើប្រភពពីអាជ្ញាធរគ្រប់គ្រងគ្រោះមហន្តរាយក្នុងតំបន់ បានរាយការណ៍ថា មកទល់ពេលនេះ មនុស្សចំនួនយ៉ាងហោច៥៣នាក់ហើយ ត្រូវបញ្ជាក់ថា បានបាត់បង់ជីវិត ខណៈអ្នករងរបួសកើនដល់៦២នាក់ អំឡុងការវាយប្រហារនៃគ្រោះរញ្ជួយដី ដែលបានកើតឡើងនៅទីក្រុង Xigaze ក្នុងស្រុក Dingri នៃតំបន់ស្វយ័ត Xizang ឬហៅថា Tibet។

ស្រុក Dingri មានមនុស្សរស់នៅប្រមាណ៦២ ០០០នាក់។ រីឯតំបន់មួយចំនួន នៅខាងនេប៉ាល់ឯណោះវិញ ក៏បានទទួលរងឥទ្ធិពល នៃគ្រោះរញ្ជួយដីកម្រិតធ្ងន់ខាងលើ ផងដែរ ប៉ុន្តែមិនទាន់ឃើញមានសេចក្តីអំពីការខូចខាត ឬមនុស្សរងគ្រោះថ្នាក់ នៅឡើយទេ៕