កម្ពុជាទទួលបានចំណូល ៣២៨លានដុល្លារ ពីការនាំចេញជ័រកៅ​ស៊ូរយៈពេល៨ខែ

ភ្នំពេញ៖ អគ្គនាយកដ្ឋានកៅស៊ូបានឱ្យដឹងថា គិតចាប់ពីខែមករា ដល់ ខែសីហា ឆ្នាំ២០២៤ កម្ពុជាបាននាំចេញជ័រកៅស៊ូ ២០៩ ៧៣៣តោន និង​ទទួលចំណូលបានចំនួន ៣២៨ ៣១៨ ១៤១ដុល្លារអាមេរិក ។ ទិន្នន័យ៨ខែនេះដែរបង្ហាញពីកំណើនចំនួន ៤ ៥៦៥តោន​ ឬស្មើ ២ភាគរយធៀបនឹងរយៈពេលដូចគ្នាកាលពីឆ្នាំ២០២៣។

ក្រៅពីជ័រកៅស៊ូ កម្ពុជាក៏បាននាំចេញឈើកៅស៊ូ ១៣ ៨៤៣ម៉ែត្រគូប ដោយទទួលបានចំណូល ២ ៦៨៣ ៨៩៧​ដុល្លារ។ ដូច្នេះ ចំណូលនៃ​ការនាំចេញទាំងពីរនេះ កើនឡើង ២១ភាគរយ ធៀបនឹងរយៈពេលដូច​គ្នានា​ឆ្នាំ ២០២៣។

ប្រភពដដែលបន្តថា ដោយឡែកខែសីហានេះវិញ កម្ពុជាបាននាំចេញជ័រ​កៅស៊ូ ៣៥ ៨១៨តោន កើនឡើង ២ ៥៥៥តោន ស្មើ៧​ភាគរយធៀប​នឹង​​ខែកក្កដា និងកើនឡើង ១ ៦១៩តោន ស្មើ៥ភាគរយ ធៀបនឹងឆ្នាំ​២០២៣។ ចំណូលនៃការនាំចេញនេះមានតម្លៃ ៥៩ ៣១០ ៩៨០ដុល្លារ។​ ក្នុងរយៈពេលដដែលនេះកម្ពុជាក៏បាននាំចេញឈើកៅស៊ូ ២ ៩៤​១​​ម៉ែត្រគូប ​និងបានចំណូល ៥៩៥ ២៥១ដុល្លារ បន្ថែមផងដែរ។

គិតចាប់ពីខែមករារហូតមកជ័រកៅស៊ូមានតម្លៃជាមធ្យម ១ ៥៦៥ដុល្លារ​ក្នុងមួយតោន គឺកើនឡើង ១៨០ដុល្លារ ក្នុងមួយតោនធៀប​រយៈពេល​ដូចគ្នាកាលពីឆ្នាំទៅមិញ។

ទន្ទឹមគ្នានឹងរបាយការណ៍អំពីការនាំចេញកៅស៊ូត្រូវបានបញ្ចេញឱ្យដឹងនេះ ក្រសួងកសិកម្ម រុក្ខាប្រមាញ់ និងនេសាទ មានខ្សែវីដេអូ​ចំនួន២​ដែល​ពាក់ព័ន្ធនឹងកៅស៊ូនេះដែរ ក្នុងនោះ ទី១.វីដេអូពីប្រវត្តិដំណាំ​កៅស៊ូនៅប្រទេសកម្ពុជា ដែលមានអាយុកាលជាង​១០០​ឆ្នាំមកហើយ និងវីដេអូទី២ និយាយពីដំណាំឧស្សាហកម្មនៅប្រទេសកម្ពុជា​ទៅថ្ងៃ​អនាគត។លោកជំទាវ អ៊ឹម រចនា អ្នកនាំពាក្យ​ក្រសួងកសិកម្ម រុក្ខាប្រមាញ់ និងនេសាទអះអាងថា ខ្សែវិដេអូទាំងពីរនេះក្រសួង​នឹងត្រូវបញ្ចេញនៅព្រហស្បតិ៍ថ្ងៃទី១៩ ខែកញ្ញា។

សូមជម្រាបថា បច្ចុប្បន្ន កម្ពុជាមានផ្ទៃដីកៅស៊ូ ៤០៧ ១៧២ហិកតា ក្នុងនោះ ផ្ទៃដីចៀរជ័រ ៣២០ ១៨៤ហិកតា ស្មើ៧៨ភាគរយ និងផ្ទៃដីថែទាំ ៨៦ ៩៨៨ហិកតា ស្មើ២១ភាគរយ។ ផ្ទៃដីកៅស៊ូ​កសិឧស្សាហកម្ម ២២៦ ៨៤០ហិកតា ស្មើ ៥៥ភាគរយ និងផ្ទៃដីកៅស៊ូគ្រួសារ ១៨០ ៣៣២ហិកតា ស្មើ ៤៤ភាគរយ៕