ក្រុមក្មេងស្ទាវដែលតែងតែអុកឡុកវ៉ៃកាប់គេឯងជាច្រើនលើកនៅក្នុងខេត្តស្វាយរៀងត្រូវបានសមត្ថកិច្ចស្រុកស្វាយជ្រំវ៉ៃខ្នោះ

អត្ថបទ៖ ភក្តី 

ខេត្តស្វាយរៀង៖ក្រុមក្មេងស្ទាវដែលតែងតែចេញដើរអុកឡុកវ៉ៃកាប់គេឯងជាច្រើនលើកនៅក្នុងខេត្តស្វាយរៀងនោះត្រូវបានសមត្ថកិច្ចស្រុកស្វាយជ្រំវ៉ៃខ្នោះដាក់គុកហើយ។

យោងតាមសមត្ថកិច្ចស្រុកស្វាយជ្រំបានឲ្យដឹងថា៖នៅថ្ងៃទី០៧.០៧.២០២៤ វេលាម៉ោង១០:៣០នាទីព្រឹក ប៉ុស្តិ៍នគរបាលរដ្ឋបាលធ្លក បានទទួលពាក្យបណ្តឹងពីជនរងគ្រោះ មានទីលំនៅភូមិទៃយា ឃុំធ្លក ស្រុកស្វាយជ្រំ បានមកដាក់ពាក្យបណ្តឹង ប្តឹងទៅលើ ជនសង្ស័យ០៣នាក់ មានទីលំនៅភូមិឃ្លាំង ឃុំពោធិរាជ ស្រុកស្វាយជ្រំ ថាបានជិះម៉ូតូដេញកាប់ខ្លួននៅចំណុចផ្លូវកៅស៊ូ ស្ថិតនៅក្នុងភូមិទៃយា ឃុំធ្លក ស្រុកស្វាយជ្រំ កាលពីថ្ងៃទី០៦.០៧.២០២៤ វេលាម៉ោង២២:៣០ នាទីបណ្ដាលឲ្យដូលម៉ូតូនិងមានរបួសស្នាម ។

 ប្រភពបានបន្តទៀតថា៖បន្ទាប់ពីទទួលពាក្យបណ្ដឹងភ្លាមកម្លាំងជំនាញស្រុកសហការ ជាមួយកម្លាំងប៉ុស្ដិ៍នគរបាលរដ្ឋបាលធ្លក និងកម្លាំងប៉ុស្តិ៍នគរបាលរដ្ឋបាលពោធិរាជ ចុះទៅដល់កន្លែងកើតហេតុធ្វើការស្រាវជ្រាវ និងបានស្ដាប់ការបំភ្លឺពីជនរងគ្រោះ បានឆ្លើយរៀបរាប់ថា កាលពីថ្ងៃទី០៦.០៧.២០២៤ វេលាម៉ោង២២ និង៣០នាទី ខ្លួនបានជិះម៉ូតូចេញពីធ្វើការរោងចក្រកង់ឡាននៅខ្ជាយ ជិះម៉ូតូរហូតចំណុចផ្សារអូសំដី ឃុំពោធិរាជ ស្រាប់តែជួប និងជនសង្ស័យ ទាំង៣នាក់ខាងលើ និងបក្សពួក២ទៅ៣នាក់ទៀតមិនស្គាល់ឈ្មោះកំពុងតែឈរនៅលើផ្លូវកៅស៊ូមុខផ្ទះតារាងបាល់ទះខ្លួនក៏ជិះម៉ូតូតាមបណ្តោយផ្លូវទៅទិសខាងជើង ស្រាប់តែ ជនសង្ស័យមានគ្នា៣នាក់ បានជិះម៉ូតូ០១គ្រឿងម៉ាកវីន័រអុិច ឌុបគ្នា ដេញតាមខ្លួន ពីក្រោយរហូតដល់ចំណុចភូមិទៃយា ឃុំធ្លក បានធ្វើសកម្មភាព យកកាំបិតផ្គាគ់កាប់មកលើរូបខ្លួនពេលនោះខ្លួនបានជិះម៉ូតូគេចចេញបណ្ដាលឲ្យដួលម៉ូតូខូចខាត និងមានរបួសស្នាម ភ្លាមនោះជនសង្ស័យទាំង០៣នាក់ បានជិះម៉ូតូគេចខ្លួនទៅទិសខាងត្បូងបាត់តែម្ដង។

ប្រភពបានឲ្យដឹងទៀតថា៖ក្រោយពីបានស្ដាប់ការបំភ្លឺ ពីជនរងគ្រោះរួចហើយ សមត្ថកិច្ចយើង បានធ្វើការស្រាវជ្រាវ និងឃាត់បានជនសង្ស័យបាន ០១នាក់ ភេទប្រុស ជនជាតិខ្មែរ មុខរបរកសិករ  មានទីលំនៅភូមិឃ្លាំង ឃុំពោធិរាជ ស្រុកស្វាយជ្រំ ខេត្តស្វាយរៀង និងបាននាំខ្លួនមកប៉ុស្ដិ៍នគរបាលរដ្ឋបាលធ្លក ដើម្បីសួរនាំ នៅចំពោះមុខសមត្ថកិច្ចជនសង្ស័យឆ្លើយសារភាពថា កាលពីថ្ងៃទី០៦.០៧.២០២៤ វេលាម៉ោង១៩:០០នាទី បក្សពួកខ្លួនមានគ្នាចំនួន០៩នាក់ បានបបួលគ្នាជិះម៉ូតូ០៤គ្រឿងឌុបគ្នាទៅលេងនៅក្រុងស្វាយរៀង លុះដល់ម៉ោង២២:៣០ នាទី ពួកខ្លួនបានជិះមកដល់ចំណុចលើផ្លូវកៅស៊ូ ស្ថិតនៅភូមិអូសំដី ឃុំពោធិរាជ  ភ្លាមនោះស្រាប់តែឃើញម៉ូតូ០១គ្រឿងម៉ាកហុងដា ជិះមកពីទិសខាងត្បូង ពេលនោះមានក្រុមបក្សពួកខ្លួន បានជិះម៉ូតូឌុបគ្នា ដេញតាមជនរងគ្រោះពីក្រោយរហូតដល់ភូមិទៃយា ឃុំធ្លក ក៏បានហូតខ្សែក្រវាត់ពីចង្កេះម្នាក់មួយ វាយទៅលើជនរងគ្រោះបណ្ដាលឲ្យដួលម៉ូតូនៅលើផ្លូវខូចខាត និងមានរបួសស្នាមមែន ។ 

 បន្ទាប់មកពួកខ្លួនទាំង៣នាក់បានជិះម៉ូតូមកជួបជុំគ្នាវិញ ក៏បបួលគ្នាជិម៉ូតូទៅលេងនៅក្រុងស្វាយរៀងម្តងទៀត ទៅយកកាំបិតផ្គាគ់ របស់ពួកខ្លួនដែលលាក់ទុកនៅផ្លូវពេទ្យអនាម័យក្រុងស្វាយរៀង ពេលយកកាំបិតផ្គាគ់បានហើយក៏នាំគ្នាដើរលេងរហូតដល់ វេលាម៉ោង០២និង០០នាទីយប់ឆ្លងចូលថ្ងៃទី០៧.០៧.២០២៤ ក៏នាំគ្នាជិះមកផ្ទះវិញ ក៏បានឲ្យកាំបិតផ្គាគ់យកទៅលាក់ទុក។ ក្រោយពីបានស្តាប់ចម្លើយសារភាពរបស់ជនសង្ស័យរួចហើយសមត្ថកិច្ចយើងបាននាំខ្លួនជនសង្ស័យទៅដកហូតវត្ថុតាងដែលយកលាក់ទុកនៅផ្ទះយាយនៅភូមិឃ្លាំង ឃុំពោធិរាជ  ស្រុកស្វាយជ្រំ  បានកាំបិតផ្គាគ់ចំនួន០១ ដាវចំនួន០២ ដែលជាវត្ថុតាងលាក់ទុកសំរាប់ធ្វើសកម្មភាព។  បន្ទាប់សមត្ថកិច្ចយើងបានសាកសួរជនសង្ស័យបន្តទៀត ក៏បានឆ្លើយសារភាពថាបក្សពួកខ្លួនកន្លងមកធ្លាប់កាន់ដាវ និងកាំបិតជិះម៉ូតូដើរលេងនៅក្រុងស្វាយរៀង និងធ្លាប់ដេញកាប់ក្រុមក្មេងទំនើងនៅផ្សាជីភូដែលដើរលេងយប់ជាច្រើនលើកដែរ។  

ក្រោយពីបានស្តាប់ចម្លើយសារភាពរបស់ជនសង្ស័យទាំង៣នាក់រួចហើយ លោកអធិការនគរបាលស្រុកស្វាយជ្រំ បានរាយការណ៍ជូនលោកឧត្តមសេនីយ៍ទោ ស្នងការ និង សុំយោបល់ឯកឧត្តម ខាំ សុផារី ព្រះរាជអាជ្ញា អមសាលាដំបូងខត្តស្វាយរៀង ឃាត់ខ្លួនជនសង្ស័យទាំង៣នាក់ព្រមទាំងចាប់យកវត្ថុតាងកសាងសំណុំរឿងចាត់ការតាមនីតិវិធី។ ចំពោះក្រុមបក្សពួក៦នាក់ទៀត បានរត់គេចខ្លួនបាត់ពីមូលដ្ឋាន។ កន្លងមកក្រុមបក្សពួកទាំង៩នាក់ដែលមានឈ្មោះខាងលើនេះក៏ធ្លាប់កាន់ដាវ និងកាំបិតដើរបង្កអុកឡុកនៅឃុំពោធិរាជ ឃុំធ្លក និងដូនស នៅក្នុងស្រុកស្វាយជ្រំ ផងដែរ៕