តួកគីចោទលោក ចូ បៃដិន និងរដ្ឋបាលអាមេរិកថា ជាប់ពាក់ព័ន្ធនឹងអំពើឧក្រិដ្ឋសង្គ្រាមរបស់អ៊ីស្រាអែល

ប្រភព៖ AFP

អង់ការា៖ ប្រធានាធិបតីតួកគី លោក Recep Tayyip Erdogan បាននិយាយថា ប្រធានាធិបតីអាមេរិក លោក Joe Biden និងរដ្ឋបាលរបស់លោក មានការជាប់ទាក់ទងនឹងក្នុងអ្វីដែលលោកបានពិពណ៌នាថា ជាឧក្រិដ្ឋកម្មសង្រ្គាមរបស់អ៊ីស្រាអែល និងការរំលោភច្បាប់អន្តរជាតិនៅក្នុងជម្លោះហ្គាហ្សា ហើយបានអំពាវនាវឱ្យដាក់ទណ្ឌកម្មលើអ៊ីស្រាអែល។

តួកគីដែលជាសមាជិកណាតូ បានថ្កោលទោសការវាយប្រហាររបស់អ៊ីស្រាអែលលើតំបន់ហ្គាហ្សា បញ្ឈប់ការធ្វើពាណិជ្ជកម្មជាមួយអ៊ីស្រាអែល ហើយបានសម្តែងការគាំទ្រចំពោះក្រុមហាម៉ាស់។ ប្រទេសនេះរិះគន់ប្រទេសលោកខាងលិចម្តងហើយម្តងទៀត ចំពោះការគាំទ្រអ៊ីស្រាអែល ហើយបានអំពាវនាវឱ្យអ៊ីស្រាអែលទទួលទណ្ឌកម្មនៅចំពោះមុខតុលាការអន្តរជាតិ។

នៅក្នុងបទសម្ភាសន៍ជាមួយទស្សនាវដ្ដី Newsweek ក្នុងអំឡុងពេលកិច្ចប្រជុំកំពូលរបស់អង្គការណាតូនៅទីក្រុងវ៉ាស៊ីនតោន លោក Erdogan បាននិយាយថាការសម្លាប់ជនស៊ីវិលយ៉ាងព្រៃផ្សៃ របស់អ៊ីស្រាអែល និងការវាយប្រហាររបស់ខ្លួនទៅលើមន្ទីរពេទ្យ មជ្ឈមណ្ឌលផ្តល់ជំនួយ និងកន្លែងផ្សេងទៀតគឺជាឧក្រិដ្ឋកម្មសង្គ្រាម។

លោក Erdogan ត្រូវបានគេដកស្រង់សម្តីដោយនិយាយថាប៉ុន្តែរដ្ឋបាលអាមេរិកមិនអើពើនឹងការរំលោភទាំងនេះ ហើយផ្តល់ឱ្យអ៊ីស្រាអែលនូវចំនួនទឹកប្រាក់ដ៏ច្រើនសន្ធឹកសន្ធាប់។ ពួកគេធ្វើបែបនេះពិតជាបានជាប់ទាក់ទងនឹងការរំលោភទាំងនេះ។

ប្រធានាធិបតីតួកគីរូបនេះ បាននិយាយទៀតថា ក្នុងដំណាក់កាលនេះ តើអ្នកណានឹងដាក់ទណ្ឌកម្មប្រឆាំងនឹងអ៊ីស្រាអែល ចំពោះការបំពានច្បាប់អន្តរជាតិ? នេះគឺជាសំណួរពិត ហើយគ្មាននរណាម្នាក់អាចឆ្លើយវាបានទេ។

អ៊ីស្រាអែលតែងតែបដិសេធការចោទប្រកាន់ថា ខ្លួនបានប្រព្រឹត្តឧក្រិដ្ឋកម្មសង្គ្រាមនៅក្នុងការប្រយុទ្ធរបស់ខ្លួន ប្រឆាំងនឹងចលនាហាម៉ាសប៉ាឡេស្ទីននៅតំបន់ហ្គាហ្សាស្ទ្រីប៕