សិង្ហបុរី បញ្ជូនយោធាពីររូបចូលរួមសង្កេតការណ៍លើបញ្ហាជម្លោះព្រំដែនរវាងកម្ពុជា-ថៃ

ភ្នំពេញ៖ ប្រទេសសិង្ហបុរី បានបញ្ជូនយោធាពីររូបមកបំពេញបេសកកម្មជា​អ្នកសង្កេត​ការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែនកម្ពុជា-ថៃ។

លោកស្រីឧត្តមសេនីយ៍ឯក ម៉ាលី សុជាតា អ្នកនាំពាក្យក្រសួងការពារជាតិកម្ពុជា បានឱ្យដឹងថា មន្ត្រីយោធារបស់ប្រទេសសិង្ហបុរីទាំងពីររូបនេះ ទី១) វរសេនីយ៍ត្រី Li Yiming និងទី២) ព្រិន្ទបាលឯក Toh Wee Chiang។

លោកស្រី បានឱ្យដឹងថា មន្ត្រីយោធាទាំងពីររូប បានមកដល់​អាកាសយានដ្ឋាន​អន្តរជាតិ​សៀមរាបអង្គរ ខេត្តសៀមរាប នៅរសៀលថ្ងៃទី១៦ ខែមករា ឆ្នាំ២០២៦នេះ។

ក្រសួងការពារជាតិ នៃព្រះរាជាណាចក្រកម្ពុជា បានទទួលស្វាគមន៍យ៉ាងកក់ក្តៅបំផុតចំពោះប្រទេសសិង្ហបុរី ដែលបានចាត់បញ្ជូននាយទាហានចំនួន ២រូប គឺ មកចូលរួមជាមួយក្រុមអ្នកសង្កេតការណ៍អាស៊ាន (AOT) ដែលដឹកនាំដោយប្រទេសម៉ាឡេស៊ី ក្នុងការចុះសង្កេតការណ៍ ផ្ទៀងផ្ទាត់ និងរាយការណ៍ អំពីស្ថានភាពព្រំដែន បន្ទាប់ពីការចូលជាធរមាននៃបទឈប់បាញ់។

លោកស្រីអ្នកនាំពាក្យក្រសួងការពារជាតិ បានគូសបញ្ជាក់ថា កម្ពុជាតែងតែ​ផ្តល់​ការគាំ​ទ្រ​យ៉ាងពេញទំហឹងដល់ក្រុមអ្នកសង្កេតការណ៍អាស៊ាន (AOT) ព្រមទាំងសង្កត់ធ្ងន់​ទៅលើសារៈសំខាន់មិនអាចខ្វះបានក្នុងការពង្រឹងតួនាទី និងអាណត្តិរបស់ AOT ដើម្បី​ផ្ទៀងផ្ទាត់ និងធានាការអនុវត្តបទឈប់បាញ់ ក៏ដូចជាវិធានការនានា ដែលបានឯកភាព​គ្នារវាងកម្ពុជានិងថៃឱ្យបានពេញលេញ និងប្រកបដោយប្រសិទ្ធភាព សំដៅលើកកម្ពស់​តម្លាភាព គណនេយ្យភាព និងការជឿទុកចិត្តគ្នាទៅវិញទៅមក និងតែងតែស្វាគមន៍​ដល់​បណ្តាប្រទេសជាមិត្តដែលមានបំណងក្នុងការចូលរួមជួយលើកិច្ចការនេះបន្ថែមទៀត។

អ្នកសង្កេតការណ៍អាស៊ាន ជាយន្តការដែលបង្កើតឡើងដោយអាស៊ាន ហើយទទួល​បាន​ការ​គាំទ្រដោយលោក ដូណាល់ ត្រាំ ប្រធានាធិបតីអាមេរិក និងបណ្តាប្រទេសនានាផងដែរ។ អ្នកសង្កេតការណ៍សុទ្ធសឹងជា​ជាយោធានៃបណ្តាប្រទេសសមាជិកអាស៊ាន មានបេសកកម្មពិសេសចុះសង្កេតការណ៍ ផ្ទៀងផ្ទាត់ និងរាយការណ៍លើជម្លោះព្រំដែនរវាងកម្ពុជា និងថៃ ជាពិសេសការអនុវត្តន៍​លើបទឈប់បាញ់ ក៏ដូចជាសេចក្តីថ្លែងការណ៍រួមដែលបានធ្វើឡើងកាលពីថ្ងៃទី២៦ ខែតុលា ឆ្នាំ២០២៥៕