មនុស្ស២៦នាក់ស្លាប់នៅហ្វីលីពីន ដោយសារការវាយប្រហារនៃព្យុះ Kalmaegi

ម៉ានីល៖ ទីភ្នាក់ងារគ្រប់គ្រងគ្រោះមហន្តរាយរបស់ហ្វីលីពីន បានឱ្យដឹងថា មនុស្សយ៉ាងហោច២៦នាក់ហើយបានស្លាប់ ក្រោយព្យុះឈ្មោះ Kalmaegi បានវាយប្រហារចំភាគកណ្តាលប្រទេស ដោយនាំមកជាមួយនូវភ្លៀងធ្លាក់និងខ្យល់បោកបក់យ៉ាងខ្លាំងក្លា ហើយបង្ខំឱ្យមនុស្ស​រាប់ម៉ឺននាក់ ត្រូវជម្លៀសចេញពីផ្ទះសម្បែងរបស់ពួកគេ។

ព្យុះ Kalmaegi បានធ្វើដំណើរមកដល់ហ្វីលីពីន នាថ្ងៃអង្គារនេះ ជាមួយកម្លាំងខ្យល់បក់ចន្លោះ១៥០-២០៥ គីឡូម៉ែត្រក្នុងមួយម៉ោង ហើយវាត្រូវបានព្យាករថា នឹងចេញផុតទៅសមុទ្រចិនខាងត្បូងនៅថ្ងៃពុធ។ ប្រជាជនហ្វីលីពីនរាប់ម៉ឺននាក់ ត្រូវបានជម្លៀសខ្លួននៅទូទាំងតំបន់ Visayas ក្នុងនោះរួមមានទាំងនៅភាគខាងត្បូងកោះ Luzon និងភាគខាងជើងកោះ Mindanao។ បើតាមអាជ្ញាធរហ្វីលីពីន ភាគច្រើននៃអ្នកបាត់បង់ជីវិត គឺដោយសារលង់ទឹក ក្នុងនោះ២១នាក់ នៅខេត្ត Cebu ជាទីដែលក្រុងជាច្រើន បានរងការជន់លិច។

សូមជម្រាបថា ការមកដល់នៃព្យុះ Kalmaegi គឺស្របពេលហ្វីលីពីន ដែលជាប្រទេសរងគ្រោះដោយសារព្យុះត្រូពិក និងទីហ្វុង ជាមធ្យមចំនួន២០ ក្នុងមួយឆ្នាំៗ ទើបតែជួបប្រទះគ្រោះធម្មជាតិជាបន្តបន្ទាប់ អំឡុងពេលប៉ុន្មានខែចុងក្រោយនេះ ដែលរួមមានទាំងគ្រោះរញ្ជួយដី និងព្យុះបោកបក់។ បន្ទាប់ពីហ្វីលីពីន ព្យុះ Kalmaegi ត្រូវបានព្យាករថា នឹងធ្វើដំណើរទៅដល់វៀតណាមថែមទៀត ក្នុងសប្តាហ៍នេះ៕ (Reuters)