កងទ័ពអ៊ីស្រាអែល រុះរើមជ្ឈមណ្ឌលផ្តល់ជំនួយនៅហ្កាហ្សា ដែលគាំទ្រដោយអាមេរិក ក្រោយបទឈប់បាញ់ចូលជាធរមាន

ហ្កាហ្សា៖ ប្រភពប៉ាឡេស្ទីនបាននិយាយនៅថ្ងៃអាទិត្យថា កងទ័ពអ៊ីស្រាអែលបានរុះរើមជ្ឈមណ្ឌលផ្តល់ជំនួយមនុស្សធម៌នៅក្នុងតំបន់ហ្កាហ្សា ដែលដំណើរការដោយអង្គការមួយដែលគាំទ្រដោយសហរដ្ឋអាមេរិក បន្ទាប់ពីបទឈប់បាញ់រវាងអ៊ីស្រាអែល និងក្រុមហាម៉ាសចូលជាធរមាន។

ប្រភពដដែលបានបញ្ជាក់ថា វិធានការនេះគឺសំដៅលើទីតាំងដែលដំណើរការដោយមូលនិធិមនុស្សធម៌ហ្កាហ្សា (GHF) ដែលជាក្រុម NGO របស់អាមេរិក បង្កើតឡើងដោយមានការផ្តល់មូលនិធិពីសហរដ្ឋអាមេរិក និងស្ថិតក្រោមការត្រួតពិនិត្យរបស់យោធាអ៉ីស្រាអែល។ មូលនិធិនេះត្រូវបានបង្កើតឡើងជាជម្រើសជំនួសទីភ្នាក់ងារ UNRWA របស់អង្គការសហប្រជាជាតិ។

មជ្ឈមណ្ឌលទាំងនេះបានបង្កឱ្យមានការខឹងសម្បារក្នុងចំណោមប្រជាជនប៉ាឡេស្ទីន ដែលបានពណ៌នាថាពួកវាគ្មានសុវត្ថិភាព។ ការិយាល័យព័ត៌មានរបស់ក្រុមហាម៉ាសបានអះអាងថា មនុស្សជាង ២,៥០០នាក់បានស្លាប់ក្នុងឧបទ្ទវហេតុអំឡុងពេលចែកចាយជំនួយ ប៉ុន្តែតួលេខនេះមិនអាចផ្ទៀងផ្ទាត់ដោយឯករាជ្យបានទេ។

សូមជម្រាបថា វិធានការនេះកើតឡើង ខណៈដែលអ្នកសម្របសម្រួលអន្តរជាតិកំពុងជំរុញឱ្យមានការស្តារលំហូរជំនួយទៅកាន់តំបន់ហ្កាហ្សាឡើងវិញ។ យោធា និងរដ្ឋាភិបាលអ៉ីស្រាអែលមិនទាន់ធ្វើអត្ថាធិប្បាយនៅឡើយទេ ប៉ុន្តែវិទ្យុកងទ័ពអ៉ីស្រាអែលបានរាយការណ៍ថា «គម្រោងមជ្ឈមណ្ឌលចែកជំនួយរបស់អាមេរិក បានបញ្ចប់ដោយគ្មានការប្រកាសជាផ្លូវការ»៕