បទវិភាគ៖ វិភាគពីកាលានុវត្តភាពថ្មីនៃការបើកទូលាយរបស់ចិនតាមរយៈពិព័រណ៍ពាណិជ្ជកម្មសេវាកម្មចិនអន្តរជាតិ
បរទេស៖ ក្នុងពិព័រណ៍ពាណិជ្ជកម្មសេវាកម្មចិនអន្តរជាតិឆ្នាំ២០២៥ដែលបិទបញ្ចប់កាលពីថ្ងៃទី១៤ខែកញ្ញា លោក Daniel Boyer អនុប្រធានប្រតិបត្តិនៃគណៈកម្មាធិការពាណិជ្ជកម្មនិងវិនិយោគអូស្ត្រាលីដែលបានចូលរួមពិព័រណ៍នេះជាច្រើនលើកបានថ្លែងថា ពិព័រណ៍ដ៏អស្ចារ្យលើកនេះធ្វើឱ្យលោកមានចំណាប់អារម្មណ៍យ៉ាងខ្លាំង ដោយសារសេវាកម្មជា “កម្លាំងជំរុញដែលមិនអាចខ្វះបានក្នុងការអភិវឌ្ឍទំនាក់ទំនងរវាងអូស្ត្រាលីនិងចិន” ។
បច្ចុប្បន្ននេះ ពាណិជ្ជកម្មសេវាកម្មបានក្លាយជាក្បាលម៉ាស៊ីនថ្មីសម្រាប់កំណើនសេដ្ឋកិច្ចនិងពាណិជ្ជកម្មទូទាំងពិភពលោក ។ ពិព័រណ៍ពាណិជ្ជកម្មសេវាកម្មចិនអន្តរជាតិលើកនេះបានទាក់ទាញប្រទេសនិងអង្គការអន្តរជាតិចំនួន៨៥ចូលរួម ហើយក្រុមហ៊ុនលំដាប់កំពូលទាំង៥០០និងសហគ្រាសនាំមុខលើពិភពលោកចំនួនជិត៥រយសហគ្រាសបានចូលរួមពិព័រណ៍លើកនេះ ដែលបានឈានដល់សមិទ្ធផលលើសពី៩រយ ។ ក្នុងនោះ ក្នុងនាមជាប្រទេសភ្ញៀវកិត្តិយស អូស្ត្រាលីបានរៀបចំគណៈប្រតិភូធំបំផុតតាំងពីបានចូលរួមពិព័រណ៍នេះ ។ លោក Dominic Trindade អគ្គទីប្រឹក្សាពាណិជ្ជកម្មនៃស្ថានទូតអូស្ត្រាលីប្រចាំនៅចិនបានថ្លែងថា ក្នុងបរិបទដែលទូទាំងពិភពលោកពោរពេញទៅដោយភាពមិនប្រាកដប្រជា ពិព័រណ៍ពាណិជ្ជកម្មសេវាកម្មចិនអន្តរជាតិបានជំរុញយ៉ាងខ្លាំងនូវការផ្លាស់ប្តូររវាងភាគីនានា ក៏ដូចជាការផ្តល់ផលប្រយោជន៍ដល់គ្នាទៅវិញទៅមកនិងឈ្នះ-ឈ្នះ ។ ក្រុមមិត្តភក្តិដែលពង្រីកធំជាបន្តបន្ទាប់បានបញ្ជាក់ពីពាក្យសម្តីរបស់លោក Xi Jinping ប្រធានរដ្ឋចិនដែលបានថ្លែងក្នុងសារលិខិតអបអរសាទរជូនចំពោះពិព័រណ៍លើកនេះ ពោលគឺចិននឹងពង្រីកការបើកទូលាយចំពោះអន្តរជាតិប្រកបដោយកម្រិតខ្ពស់ដោយមិនងាករេ ។
តាមទិន្នន័យបង្ហាញឱ្យដឹងថា នៅឆ្នាំ២០២៤ ទំហំសរុបនៃពាណិជ្ជកម្មសេវាកម្មរបស់ចិនបានវាយទម្លុះ១ទ្រីលានដុល្លារអាមេរិកជាលើកដំបូង ដែលបានបង្កើតកំណត់ត្រាថ្មី និងកាន់លំដាប់ថ្នាក់ទីពីរលើទូទាំងពិភពលោក ។
ក្នុងនោះ ទំហំពាណិជ្ជកម្មសេវាកម្មផ្អែកលើជំនាញដែលមានលក្ខណៈពិសេសលើវិស័យឌីជីថលនីយកម្ម ភាពវៃឆ្លាតនិងភាពបៃតងបានកើនឡើង៣៨ភាគរយបើប្រៀបធៀបនឹងឆ្នាំ២០២០ ប្រការនេះបានធ្វើឱ្យការច្នៃប្រឌិតថ្មីផ្នែកបច្ចេកវិទ្យាឌីជីថលវៃឆ្លាតក្លាយជាពាក្យគន្លឹះនៃពិព័រណ៍ពាណិជ្ជកម្មសេវាកម្មចិនអន្តរជាតិលើកនេះ ។
លោកស្រី Yang Donglan អគ្គនាយករងប្រចាំតំបន់ប្រទេសចិននៃក្រុមហ៊ុន PHILIPS បានថ្លែងថា មជ្ឈមណ្ឌលស្រាវជ្រាវអភិវឌ្ឍន៍ក្រុងប៉េកាំងដែលក្រុមហ៊ុន PHILIPS ជិតនឹងដាក់ឱ្យប្រើប្រាស់ នឹងចាត់ទុកបញ្ញាសិប្បនិម្មិតជាចំណុចសំខាន់នៃការច្នៃប្រឌិតថ្មី រំពឹងថា អាចឆ្លៀតឱកាសការអភិវឌ្ឍយ៉ាងឆាប់រហ័សនៃបច្ចេកវិទ្យាបញ្ញាសិប្បនិម្មិតរបស់ចិនលើកកម្ពស់សមត្ថភាពច្នៃប្រឌិតថ្មីរបស់ក្រុមហ៊ុន PHILIPS ។
សហគ្រាសទុនបរទេសបន្ថែមវិនិយោគនៅប្រទេសចិន គឺដោយមកពីបានផ្តោតសំខាន់ទៅលើទីផ្សារធំធេងរបស់ចិន ។ បច្ចុប្បន្ននេះ ចិនបានក្លាយជាដៃគូពាណិជ្ជកម្មលំដាប់បីលេខខាងមុខរបស់ប្រទេសនិងតំបន់ចំនួន១៥៧ គឺជាប្រទេសពាណិជ្ជកម្មទំនិញធំទីមួយនិងប្រទេសពាណិជ្ជកម្មសេវាកម្មធំទីពីរនៅលើពិភពលោក ។
ក្នុងពិព័រណ៍ពាណិជ្ជកម្មសេវាកម្មចិនអន្តរជាតិឆ្នាំនេះ ភាគីចិនបានប្រកាសវិធានការមួយចំនួន ដែលបូករួមទាំង “ពន្លឿនការសាកល្បងនិងដំណើរការនៅតំបន់ពាណិជ្ជកម្មសេរីសាកល្បងនិងតំបន់គំរូការអភិវឌ្ឍច្នៃប្រឌិតថ្មីខាងពាណិជ្ជកម្មសេវាកម្មជាតិ” និង“ជំរុញការបើកទូលាយទីផ្សារសេវាកម្មដោយមានរបៀបរៀបរយ ជំរុញការអភិវឌ្ឍប្រកបដោយគុណភាពខ្ពស់របស់ពាណិជ្ជកម្មសេវាកម្ម”ជាដើម ។ ប្រការទាំងនេះធ្វើឱ្យសហគ្រាសបរទេសមានជំនឿចិត្តខាងការអភិវឌ្ឍកាន់តែខ្លាំងឡើងៗ ។
ពីពិព័រណ៍អន្តរជាតិចិនសម្រាប់វិនិយោគនិងពាណិជ្ជកម្ម ពិព័រណ៍ពាណិជ្ជកម្មសេវាកម្មចិនអន្តរជាតិដែលទើបបិទបញ្ចប់ ដល់ពិព័រណ៍នាំចូលចិនអន្តរជាតិដែលនឹងបើកធ្វើនៅខែវិចិ្ឆកាខាងមុខនេះ ពិព័រណ៍អន្តរជាតិមួយចំនួនបានបញ្ជាក់យ៉ាងពេញលេញថា ការបើកទូលាយនិងធ្វើកិច្ចសហប្រតិបត្តិការជាបំណងរួមរបស់ប្រជាជន ហើយឯកតោភាគីនិយមនិងការពារនិយមគ្មានអនាគតទេ ។ ឆ្លងតាមរយៈពិព័រណ៍ទាំងនេះ ពិភពលោកមិនត្រឹមតែឃើញភាពថ្មីកាន់តែច្រើននៃសេដ្ឋកិច្ចចិនប៉ុណ្ណោះទេ ថែមទាំងក៏បានទទួលអារម្មណ៍ពីការប្តេជ្ញាចិត្តរបស់ចិនដែលចង់ស្វែងរកការអភិវឌ្ឍរួមនិងកសាងសេដ្ឋកិច្ចពិភពលោកបែបបើកទូលាយជាមួយពិភពលោកផងដែរ ៕
Post a Comment