ការកសាងអនាគតប្រកបដោយសុខភាព៖ ទីភ្នាក់ងារកយកា សមាគមអតីតកម្មសិក្សាការីកម្ពុជា-កូរ៉េ បានការចូលរួមក្នុងសង្គមនៅខេត្តពោធិ៍សាត់

ខេត្តពោធិ៍សាត់៖ ថ្ងៃទី១៦ ខែកញ្ញា ឆ្នាំ២០២៥ ការិយាល័យទីភ្នាក់ងារសហប្រតិបត្តិការអន្តរជាតិកូរ៉េ(កយកា-KOICA)ប្រចាំប្រទេសកម្ពុជា រួមជាមួយនឹងសមាគមអតីតកម្មសិក្សាការីកម្ពុជា-កូរ៉េ (CAMKAA) និងអ្នកស្ម័គ្រចិត្ត នៃកម្មវិធីអ្នកស្ម័គ្រចិត្តកូរ៉េ បានរៀបចំសកម្មភាពរួមចំណែកសង្គមរួមបញ្ចូលគ្នានៅសាលាអនុវិទ្យាល័យ និង បឋមសិក្សាកំពង់លួង ខេត្តពោធិ៍សាត់។ព្រឹត្តិការណ៍នេះ បានប្រមូលផ្តុំអ្នកចូលរួមជាង៦០០នាក់ រួមមានសិស្សានុសិស្ស លោកគ្រូ អ្នកគ្រូ មាតាបិតា មន្ត្រីមូលដ្ឋាន អ្នកស្ម័គ្រចិត្ត និងសមាជិកសហគមន៍ ដែលធ្វើឱ្យទីធ្លាសាលាក្លាយជាមជ្ឈមណ្ឌលថាមពលនិងសុច្ឆន្ទៈ។

ពិធីនេះ មានការចូលរួមពី ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ លោក នី ចិត្រា​ នាយកសាលាបឋមសិក្សាកំពង់លួង​ និងលោកស្រី ឆយ មូន ជុង (Ms. CHOI Moon Jung) នាយិកា ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ប្រចាំប្រទេសកម្ពុជា ឯកឧត្ដម អ៊ឹម សួរ ប្រធានសមាគមអតីតកម្មសិក្សាការីកម្ពុជា-កូរ៉េ (CAMKAA) រួមជាមួយនឹងសមាជិកក្រុមប្រឹក្សាភិបាលសមាគមអតីតកម្មសិក្សាការីកម្ពុជា-កូរ៉េ (CAMKAA) បានចូលរួមក្នុងព្រឹត្តិការណ៍នេះ។ មន្ត្រីរដ្ឋាភិបាលខេត្តពោធិ៍សាត់ប្រមាណ២០នាក់ ក៏បានចូលរួមផងដែរ រួមជាមួយនឹងបុគ្គលិកទីភ្នាក់ងារសហប្រតិបត្តិការអន្តរជាតិកូរ៉េ​ (កយកា-KOICA) និងអ្នកស្ម័គ្រចិត្ត នៃកម្មវិធីអ្នកស្ម័គ្រចិត្តកូរ៉េ។

ជាផ្នែកមួយនៃព្រឹត្តិការណ៍នេះទីភ្នាក់ងារសហប្រតិបត្តិការអន្តរជាតិកូរ៉េ(កយកា-KOICA) និងសមាគមអតីតកម្មសិក្សាការីកម្ពុជា-កូរ៉េ (CAMKAA)  បានផ្តល់កង់ចំនួន១៥០គ្រឿង កាតាបស្ពាយចំនួន២៥០ សៀវភៅសរសេរចំនួន៤០០ក្បាល និងប៊ិចចំនួន៤០០ដើម ច្រាស និងថ្នាំដុសធ្មេញចំនួន៣០០ឈុត សៀវភៅសិក្សា និងសៀវភៅរឿងនិទាន និងនំចំណីអាហារមានជីវជាតិ។ អំណោយទាំងនេះនឹងផ្តល់អត្ថប្រយោជន៍ដោយផ្ទាល់ដល់សិស្សានុសិស្សរាប់រយនាក់ និងក្រុមគ្រួសាររបស់ពួកគេ ជួយកុមារក្នុងការធ្វើដំណើរទៅសាលារៀនកាន់តែងាយស្រួលសិក្សាជាមួយនឹងសម្ភារៈគ្រប់គ្រាន់ និងធ្វើឱ្យប្រសើរឡើងនូវការអនុវត្តសុខភាព និងអនាម័យរបស់ពួកគេ។

ក្រៅពីការផ្តល់ជំនួយផ្នែកសម្ភារៈ ព្រឹត្តិការណ៍នេះមានន័យសំខាន់ជាងនេះ ដោយបានរួមបញ្ចូលគំនិតផ្តួចផ្តើមកិច្ចសហប្រតិបត្តិការចម្រុះរបស់ទីភ្នាក់ងារសហប្រតិបត្តិការអន្តរជាតិកូរ៉េ(កយកា-KOICA)។ វាមិនត្រឹមតែជាពិធីផ្តល់អំណោយប៉ុណ្ណោះទេ ប៉ុន្តែវាក៏ជាវេទិកាដែលភ្ជាប់កម្មវិធីអ្នកស្ម័គ្រចិត្តរបស់កយកា-KOICA សកម្មភាពអតីតកម្មសិក្សាការី និងគំនិតផ្តួចផ្តើមផ្អែកលើគម្រោងផងដែរ។ ក្រុមអ្នកស្ម័គ្រចិត្តកូរ៉េនៃមន្ទីរពេទ្យកុមារជាតិ រួមទាំងវេជ្ជបណ្ឌិត និងគិលានុបដ្ឋាយិកាពីរនាក់ បានផ្តល់ការពិគ្រោះយោបល់ ខណៈដែល អង្គការសហប្រតិបត្តិការវេជ្ជសាស្រ្តអន្តរជាតិ(PMCI) បាននាំយករថយន្តគ្លីនិកចល័តដែលមានម៉ាស៊ីន X-ray ឌីជីថល ម៉ាស៊ីនអុលត្រាសោន ម៉ាស៊ីនតេស្តឈាម និងមុខងារផ្សេងៗ។

លើសពីនេះទៀត សមាជិកសមាគមអតីតកម្មសិក្សាការីកម្ពុជា-កូរ៉េ (CAMKAA)  និងអ្នកស្ម័គ្រចិត្ត នៃកម្មវិធីអ្នកស្ម័គ្រចិត្តកូរ៉េ បានធ្វើការអប់រំអាហារូបត្ថម្ភ និងអនាម័យជាមូលដ្ឋានសម្រាប់កុមារពីមត្តេយ្យដល់សាលាបឋមសិក្សា។ សកម្មភាពរួមមាន ការអានសៀវភៅរឿងដែលមានប្រធានបទអាហារូបត្ថម្ភដើម្បីកំណត់សារធាតុចិញ្ចឹមនៅក្នុងអាហារ ការផ្គូផ្គងមុខម្ហូបទៅនឹងរូបថត អាហារនៅសាលា និងការអនុវត្តការដុសធ្មេញជាមួយគំរូធ្មេញ។

សាលារៀនផ្ទាល់ គឺជាផ្នែកមួយនៃកម្មវិធីផ្តល់អាហារតាមផ្ទះដល់កុមារនៅសាលារៀនក្នុងប្រទេសកម្ពុជា របស់កយកា និងអង្គការស្បៀងអាហារពិភពលោក (ដំណាក់កាលទី១៖ ២០២០២០២៤​ ​និងដំណាក់កាលទី២៖ ២០២៥២០២៩)។ នៅទូទាំងខេត្តពោធិ៍សាត់ មានសាលារៀនចំនួន១១៦ បានទទួលអត្ថប្រយោជន៍ពីកម្មវិធីនេះ ដែលមានគោលបំណងលើកកម្ពស់អាហារូបត្ថម្ភរបស់កុមារ ការចូលរួមសាលា និងលទ្ធផលសិក្សាតាមរយៈការធ្វើឱ្យប្រសើរឡើងនូវប្រព័ន្ធអាហារ ដោយប្រើប្រាស់ផលិតផលកសិកម្មក្នុងស្រុក។ ការផ្សារភ្ជាប់កម្មវិធីផ្តល់ចំណីអាហារដល់សាលារៀន ជាមួយនឹងសកម្មភាពសង្គម ដូចជាព្រឹត្តិការណ៍ថ្ងៃនេះ បានបង្កើតឱ្យមានការរួមបញ្ចូលគ្នា ដែលពង្រីកពីថ្នាក់រៀនដល់សហគមន៍កាន់តែទូលំទូលាយ។

ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានសម្តែងការកោតសរសើរចំពោះការបន្តគាំទ្ររបស់ ទីភ្នាក់ងារសហប្រតិបត្តិការអន្តរជាតិកូរ៉េ(កយកា-KOICA) និងបានគូសបញ្ជាក់អំពីសារៈសំខាន់នៃភាពជាដៃគូ ដែលនាំមកនូវផលប្រយោជន៍ជាក់ស្តែងដល់កុមារ និងគ្រួសារក្នុងខេត្តពោធិ៍សាត់។

ក្នុងអំឡុងពេលនៃសុន្ទរកថារបស់ លោកស្រី ឆយ មូន ជុង (Ms. CHOI Moon Jung) នាយិកា ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ប្រចាំប្រទេសកម្ពុជា បានសង្កត់ធ្ងន់លើអត្ថន័យទូលំទូលាយនៃព្រឹត្តិការណ៍នេះថា "ព្រឹត្តិការណ៍ថ្ងៃនេះគឺជានិមិត្តរូបនៃទំនាក់ទំនងមិត្តភាពដ៏រឹងមាំនិងយូរអង្វែងរវាងកូរ៉េនិងកម្ពុជា"។ លោកស្រីក៏បានថ្លែងអំណរគុណចំពោះអភិបាលខេត្ត ឯកឧត្តម ខូយ រីដា និងរដ្ឋាភិបាលខេត្តពោធិ៍សាត់សម្រាប់កិច្ចសហប្រតិបត្តិការ និងបានបញ្ជាក់ជាថ្មីនូវការប្តេជ្ញាចិត្តរបស់ ទីភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) ចំពោះកិច្ចសហប្រតិបត្តិការរយៈពេលវែង។

 ភ្នាក់ងារសហប្រតិបត្តិការអន្តរជាតិកូរ៉េ (កយកា-KOICA) មានភាពជាដៃគូយូរអង្វែងជាមួយខេត្តពោធិ៍សាត់ ដោយបានបញ្ជូនអ្នកស្ម័គ្រចិត្ត នៃកម្មវិធីអ្នកស្ម័គ្រចិត្តកូរ៉េ ចំនួន២៥នាក់ ចាប់តាំងពីឆ្នាំ២០០៦ ក្នុងវិស័យអប់រំ សុខាភិបាល និងបណ្តុះបណ្តាលវិជ្ជាជីវៈ។ ព្រឹត្តិការណ៍នេះបង្ហាញពីរបៀបដែលកិច្ចសហការរបស់កូរ៉េជាមួយកម្ពុជាបានបញ្ចូលវិស័យជាច្រើនកម្មវិធីស្ម័គ្រចិត្ត កិច្ចសហការរបស់សមាជិកសមាគម កម្មវិធីបណ្តុះបណ្តាល និងគម្រោងថ្នាក់ជាតិ ក្រោមក្របខណ្ឌសហប្រតិបត្តិការតែមួយ បង្កើតបានលទ្ឋផលប្រកបដោយអត្ថន័យសម្រាប់កុមារ និងសហគមន៍នៅទូទាំងខេត្តពោធិ៍សាត់៕