ខេត្ដមណ្ឌលគិរី រៀបចំវេទិកាសន្ទនាស្ដីពី ”កិច្ចសហប្រតិបត្តិការក្នុងភាពជាដៃគូ ដើម្បីពង្រឹងសមត្ថភាពអង្គការសង្គមស៊ីវិលក្នុងបរិបទថ្មី”

អត្ថបទ៖ ជឹម ទូច

ខេត្តមណ្ឌលគិរី៖ នាព្រឹកថ្ងៃទី១៩ ខែសីហា ឆ្នាំ២០២៥ រដ្ឋបាលខេត្ដមណ្ឌលគិរី បានរៀបចំវេទិកាសន្ទនាស្ដីពី”កិច្ចសហប្រតិបត្តិការក្នុងភាពជាដៃគូ ដើម្បីពង្រឹងសមត្ថភាពអង្គការសង្គមស៊ីវិលក្នុងបរិបទថ្មី” ដោយមានការអញ្ជើញចូលរួមពី ឯកឧត្តម កឹមរ័ត្ន វិសិដ្ឋ នាយករងខុទ្ទកាល័យ​សម្តេច​មហាបវរធិបតី ហ៊ុន ម៉ាណែត នាយករដ្ឋមន្រ្តី​នៃព្រះរាជាណាចក្រ​កម្ពុជា និងជាប្រធានក្រុមប្រឹក្សាភិបាលវេទិការសម្ព័ន្ធសង្គមស៊ីវិល ឯកឧត្ដម ម៉ែន ង៉ុយ ប្រធានក្រុមប្រឹក្សាខេត្ដ លោក ចាន់ រតនា អភិបាលរងខេត្ត និងមានការចូលរួមពីតំណាងអង្គការ សមាគម សហជីព និងសហគមន៍ រួមទាំងតំណាង មន្ទីរជំនាញ និងការិយាល័យអន្តរវិស័យសរុបចំនួន៨៥នាក់ ដែលប្រព្រឹត្តទៅ នៅសាលប្រជុំសាលាខេត្តមណ្ឌលគីរី។

ឯកឧត្តម កឹមរ័ត្ន វិសិដ្ឋ ប្រធានក្រុមប្រឹក្សាភិបាលវេទិការសម្ព័ន្ធសង្គមស៊ីវិល បានវាយតម្លៃខ្ពស់ចំពោះសមិទ្ធផល​របស់​អង្គការសង្គមស៊ីវិលនៃខេត្តមណ្ឌលគិរី ដែលកន្លងមកបាន​ចូលរួម​ចំណែក​យ៉ាងសំខាន់ជាមួយរាជរដ្ឋាភិបាល​ក្នុងកិច្ចការ​អភិវឌ្ឍន៍​សេដ្ឋកិច្ច-សង្គមនៅថ្នាក់មូលដ្ឋាន ស្របតាមតម្រូវការ​ជាក់ស្តែង​របស់ប្រជាពលរដ្ឋ។ ឯកឧងត្តម ក៏បានលើកទឹកចិត្ត​ឱ្យអង្គការ​សង្គមស៊ីវិលបន្តគោរពច្បាប់ជាធរមាន ដើម្បីបង្ហាញអំពីសុចរិតភាព​និង​ការបង្កើនទំនុកចិត្តពីសំណាក់មហាជននិងម្ចាស់ជំនួយ ក៏ដូចជា​ត្រូវ​ពង្រឹងសាគ្គីភាពនិងបង្កើនស្មារតី​ស្នេហាជាតិ​គ្រប់​មជ្ឈដ្ឋាន​ទាំង​ក្នុង​និងក្រៅប្រទេស ក្នុងកាលៈទេសៈដែលកម្ពុជា​កំពុងប្រឈម​នឹងបញ្ហា​ជម្លោះព្រំដែនជាមួយប្រទេសជិតខាង និងភាពប្រែប្រួលនៃ​វិបត្តិសេដ្ឋកិច្ចសកល រួមទាំងកត្តាភូមិសាស្រ្តនយោបាយក្នុងតំបន់។ ជាងនេះទៀត ឯកឧត្តម បានគូសបញ្ជាក់ថា រាជរដ្ឋាភិបាលតែងយកចិត្ត​ទុក​ដាក់ខ្ពស់​ចំពោះអង្គការសង្គមស៊ីវិល ដែលជាដៃគូមិនអាចខ្វះបាន​សម្រាប់ការអភិវឌ្ឍសង្គមជាតិក្នុងគ្រប់ដំណាក់កាល ស្របតាម​មាគ៌ា​ដឹកនាំ​ដ៏ត្រឹមត្រូវ ដើម្បីចូលរួមលើកកម្ពស់វឌ្ឍនភាព សេចក្តីថ្លៃថ្នូ និងក្តីសង្ឃឹមនាពេលអនាគតរបស់ប្រជាជាតិកម្ពុជា ស្របតាម​ចក្ខុវិស័យ​និងគោលយោបាយអភិវឌ្ឍន៍របស់រាជរដ្ឋាភិបាល ក្រោម​ការ​ដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ 

លោក ចាន់ រតនា អភិបាលរងខេត្ត ឱ្យដឹងថា ការរៀបចំពិធីឡើង គឺពិតជាមានសារសំខាន់ណាស់ ក្នុងការពិនិត្យ ពិភាក្សា និងសិក្សាឈ្វេងយល់អំពីតួនាទីភារកិច្ចរបស់អង្គការសង្គមស៊ីវិលនៅក្នុងក្របខ័ណ្ឌយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាល អាណត្តិទី៧ ក្រោមការដឹកនាំប្រកបដោយថាមពល និងគតិបណ្ឌិតដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជា- ណាចក្រកម្ពុជា។ លោកអភិបាលរងខេត្ត បន្ថែមថា​​ នៅទូទាំងខេត្តមណ្ឌលគិរី បច្ចុប្បន្ននេះ មាន អង្គការ សមាគម និងសហគមន៍សរុបចំនួន ១១១ ក្នុងនោះ អង្គការជាតិ អន្តរជាតិ និងសមាគម មានចំនួន ៣៥ អង្គការ និងសហគមន៍មានចំនួន ៧៦សហគមន៍ ដោយក្នុងនោះមានជាសហគមន៍ជនជាតិដើមភាគតិច សហគមន៍ព្រៃឈើ សហគមន៍ ការពារធនធានធម្មជាតិ សហគមន៍ទេសចរណ៍ និងសហគមន៍កសិកម្មជាដើម។

អ្នកស្រី ប៉ុក បញ្ញាវិចិត្រ អតីតប្រធានអង្គការកម្ពុជា​ដើម្បីជួយស្ត្រី​មានវិបត្តិ បានអញ្ជើញចូលរួមជាវាគ្មិនធ្វើបទបង្ហាញស្តីពី «វិធីសាស្ត្រ​នៃ​ការរៀបចំគម្រោងនិងការគ្រប់គ្រងគម្រោង» ដែលនេះ​គឺជា​ផ្នែក​មួយនៃការចូលរួមចំណែករបស់វេទិការសម្ព័ន្ធសង្គមស៊ីវិល ក្នុងការពង្រឹង​សមត្ថភាព​របស់​អង្គការសង្គមស៊ីវិល ក្នុងពេលដែលប្រទេស​លោក​ខាងលិចមាននិន្នាការកាត់បន្ថយជំនួយឥតសំណងនៅកម្ពុជា។ អ្នកស្រី បានបន្ថែមថា ក្នុងកាលៈទេសៈបច្ចុប្បន្ន អង្គការ​សង្គមស៊ីវិលគួរ​ពិចារណាអំពីយុទ្ធសាស្ត្រស្វែងរកប្រភពជំនួយថ្មី ដែល​សមស្របនឹងបេសកកម្មរបស់ខ្លួន ដើម្បីអាចធានា​បាន​នូវ​និរន្តរភាពការងាររបស់អង្គការសង្គមស៊ីវិលក្នុងការចូលរួមអភិវឌ្ឍនៅថ្នាក់មូលដ្ឋាន៕