យុទ្ធនាការ «១ម៉ឺនរៀល ១ម៉ឺននាក់» ទទួលបានថវិកា ៤,៩លានដុល្លារ ពីសប្បុរសជន២៦ ម៉ឺននាក់ គិតត្រឹមថ្ងៃទី១៨ ខែមិថុនា

ភ្នំពេញ៖ យុទ្ធនាការ «១ម៉ឺនរៀល ១ម៉ឺននាក់» ឆ្នាំ២០២៥ របស់មូលនិធិគន្ធបុប្ផាកម្ពុជា ទទួលបានថវិកាបរិច្ចាគ​ចំនួន ៤,៩ លានដុល្លា ពីសប្បុរសជនចំនួន ២៦ម៉ឺននាក់ គិតត្រឹម​ថ្ងៃ​ទី​១៨ ខែមិថុនា​។ យុទ្ធនាការនេះ មានរយៈពេល១ខែមិថុនា ឆ្នាំ២០២៥ ដើម្បីរៃអង្គាស​ថវិកា​​​ពីសប្បុរសជនគ្រប់ទិសទី ទៅជួយ​​កុមារដែលសម្រាកព្យាបាលជំងឺ​ក្នុងមន្ទីរ​ពេទ្យគ​ន្ធបុប្ផា។

លោកជំទាវ ពេជ​ ចន្ទមុនី ហ៊ុន ម៉ាណែត បញ្ជាក់ថា យុទ្ធនាការនេះ មិនត្រឹមតែកៀរគរ​ថវិកា​សម្រាប់​ជួយទារក​ និងកម្ពុជាប៉ុណ្ណោះទេ តែវាការលើកកម្ពស់ស្មារតី និងទឹកចិត្ត​ដ៏សំខាន់​ដល់ក្រុមគ្រូពេទ្យ ​ក្នុងកិច្ចជួយសង្គ្រោះជីវិតទារក និងកុមារ។​

ក្នុងមួយឆ្នាំៗ មន្ទីរពេទ្យគន្ធបុប្ផា ត្រូវចំណាយថវិកាប្រមាណ ៤៣ លានដុល្លារ​ក្នុង​បេសក​កម្ម​ សង្គ្រោះជីវិតទារក កុមារ និងស្រ្តីមានផ្ទៃពោះ។ ការចូលរួមពីសប្បុរសជន គឺចាំបាច់​ខ្លាំងណាស់ ក្នុងបុព្វហេតុសង្គ្រោះជីវិតទារក​និងកុមារកម្ពុជាប្រកបដោយនិរន្តរភាព។​

ចាប់តាំងពីដំណើរការឡើងវិញ នៅឆ្នាំ១៩៩២ មកទល់បច្ចុប្បន្ន មន្ទីរពេទ្យគន្ធបុប្ផា ពិនិត្យ និងព្យាបាលផ្នែកពិគ្រោះជំងឺក្រៅដល់កុមារ និងស្រ្តីមានផ្ទៃពោះ បានប្រមាណ ២៣ លាន​នាក់ និងទទួលព្យាបាលកុមារដែលកើតជំងឺធ្ងន់ធ្ងរ បានប្រមាណ ២,៨ លាននាក់។ ក្នុង​រយៈ​ពេល៣៣ឆ្នាំមកនេះ មន្ទីរពេទ្យ ទទួលសម្រាលកូនជូនស្រ្តីមានផ្ទៃពោះ បានប្រមាណ ៤១​ម៉ឺននាក់ផងដែរ។

មូលនិធិគន្ធបុប្ផាកម្ពុជា សូមអំពាវនាវដល់សាធារណជនទាំងអស់ដែលមានលទ្ធភាព មេត្តាបន្តចូលរួមបរិច្ចាគ ក្នុងស្មារតី “ខ្មែរជួយខ្មែរ” ដើម្បីរួមគ្នាជាមួយមូលនិធិគន្ធបុប្ផាកម្ពុជា ក្នុងការនាំក្ដីសង្ឃឹម និងភាពញញឹម ដល់ទារក និងកុមារ ព្រមទាំងស្រ្តីមានផ្ទៃពោះ ដែលត្រូវការសេវាពិនិត្យ និងព្យាបាល ក៏ដូចជាសេវាសម្ភព ដោយឥតគិតថ្លៃ ប្រកបដោយគុណភាព និងមិនមានការរើសអើង នៅមន្ទីរពេទ្យគន្ធបុប្ផា ទាំងនៅរាជធានីភ្នំពេញ និងខេត្តសៀមរាប៕