អនុប្រធាន គ.ជ.ប អំពាវនាវឱ្យពលរដ្ឋ​អញ្ជើញរួសរាន់ទៅចុះឈ្មោះបោះឆ្នោត និងធ្វើបច្ចុប្បន្នភាពលើរូបថត និងខ្ចៅដៃឱ្យបានគ្រប់ៗគ្នា

ភ្នំពេញ៖ លោក ជឺ ចំណាន អនុប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានអំពាវនាវជាថ្មីម្តងទៀត​ ដល់ប្រជាពលរដ្ឋខ្មែរទាំងអស់ ប្រញាប់រួសរាន់ទៅចុះឈ្មោះបោះឆ្មោត និងអ្នកដែលមានក្នុងបញ្ជីចុះឈ្មោះបោះឆ្នោតចាប់ពី១០ឆ្នាំឡើង ត្រូវទៅធ្វើបច្ចុប្បន្នភាពទិន្នន័យជីវមាត្រ​ លើរូបថត និងខ្ចៅដៃឱ្យបានគ្រប់ៗគ្នា ខណៈការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥នេះ នឹងត្រូវបិទបញ្ចប់នៅថ្ងៃទី២៦ ខែឧសភា វេលាម៉ោង៥:៣០នាទីល្ងាច ខាងមុខនេះហើយ។ 

ការអំពាវនាវបែបនេះបានធ្វើឡើង​ ក្នុងឱកាសលោក ជឺ ចំណាន បានអញ្ជើញចុះត្រួតពិនិត្យ​ ដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោត នៅតាមបណ្ដាការិយាល័យចុះឈ្មោះបោះឆ្នោត នៅក្នុងឃុំ សង្កាត់ នៃស្រុក ក្រុងមួយចំនួន​ ក្នុងខេត្តកំពង់ឆ្នាំងនាថ្ងៃទី២២ ខែឧសភា ឆ្នាំ២០២៥។ 

លោក ជឺ ចំណាន បានមានប្រសាសន៍ថា ដំណើរការនៃការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២៥ នេះបាននិងកំពុងប្រព្រឹត្តទៅយ៉ាងរលូន​ ។

លោកបានបន្តថា ការពិនិត្យបញ្ជីឈ្មោះ និងការចុះឈ្មោះបោះឆ្នោត សម្រាប់ឆ្នាំ២០២៥ គឺអនុញ្ញាតឱ្យអ្នកមានឈ្មោះក្នុងបញ្ជីសុំផ្លាស់ប្តូរទីលំនៅ ឬសុំកែតម្រូវទិន្នន័យ​ ក្នុងករណីមានកំហុសឆ្គង ធ្វើបច្ចុប្បន្នលើរូបថត​ និងស្នាមខ្ចៅដៃ​ ក្នុងករណីបានចុះឈ្មោះឆ្នាំ២០១៦ និងចុះឈ្មោះថ្មី​ ចំពោះអ្នកមិនទាន់បានចុះឈ្មោះមកពីមុន និងអ្នកទើបនឹងគ្រប់អាយុ១៨ឆ្នាំ។ ដើម្បីចុះឈ្មោះបោះឆ្នោត ប្រជាពលរដ្ឋខ្មែរ​ ត្រូវទៅជួបដោយផ្ទាល់ជាមួយក្រុមចុះឈ្មោះបោះឆ្នោត​ នៅតាមឃុំ សង្កាត់ដែលខ្លួនកំពុងរស់នៅ ដោយយកអត្តសញ្ញាណប័ណ្ណសញ្ជាតិខ្មែរដែលមានសុពលភាពទៅបង្ហាញ​ ដល់ប្រធានក្រុមចុះឈ្មោះបោះឆ្នោត។

ដោយឡែក ចំពោះអ្នកដែលត្រូវធ្វើបច្ចុប្បន្នភាពទិន្នន័យជីវមាត្រលើរូបថតនិងខ្ចៅដៃថ្មី គឺត្រូវបង្ហាញអត្តសញ្ញាណប័ណ្ណសញ្ជាតិខ្មែរ​ ដែលមានសុពលភាព ឬឯកសារបញ្ជាក់អត្តសញ្ញាណបម្រើឱ្យការចុះឈ្មោះបោះឆ្នោត (ឯ.អ) ដែលបានប្រើពេលចុះឈ្មោះបោះឆ្នោតពីមុន ដោយមានឈ្មោះ និងទិន្នន័យត្រឹមត្រូវ និងបង្ហាញបង្កាន់ដៃ​ បញ្ជាក់ការចុះឈ្មោះបោះឆ្នោត ប្រសិនបើមាន៕