មនុស្ស៣២៦នាក់ត្រូវបានសម្លាប់ ក្រោយការវាយប្រហារតាមផ្លូវអាកាសរបស់អ៊ីស្រាអែល លើតំបន់ហ្កាហ្សា

 ប្រភព៖ Reuters

ប៉ាឡេស្ទីន៖ ក្រុមមន្ត្រីសុខាភិបាលប៉ាឡេស្ទីន ក្នុងតំបន់ហ្កាហ្សា បាននិយាយនៅថ្ងៃអង្គារ ទី១៨ ខែមីនាថា ចំនួនអ្នកស្លាប់នៅក្នុងការវាយប្រហារតាមផ្លូវអាកាសទ្រង់ទ្រាយធំរបស់អ៊ីស្រាអែល បានកើនដល់ ៣២៦នាក់ និងជាច្រើននាក់ផ្សេងទៀតរងរបួស។

ការវាយប្រហារត្រូវបានរាយការណ៍ នៅតាមទីតាំងជាច្រើនកន្លែង រួមមាន ភាគខាងជើងតំបន់ហ្កាហ្សា ទីក្រុង ហ្កាហ្សា ព្រមទាំងទីក្រុង Deir al-Balah, Khan Younis និងទីក្រុង Rafah ក្នុងភាគកណ្ដាល និងភាគខាងត្បូងនៃតំបន់ហ្កាហ្សា។

តាមក្រុមមន្ត្រីសុខាភិបាលប៉ាឡេស្ទីន មនុស្សយ៉ាងហោច៣២៦នាក់ហើយ ក្នុងនោះរួមមានកុមារជាច្រើននាក់ ព្រមទាំង ប្រមុខរដ្ឋាភិបាលហាម៉ាសនៅហ្កាហ្សា លោក Essam al-Dalis និងមន្ត្រីសន្តិសុខជាន់ខ្ពស់ហាម៉ាសម្នាក់គឺ លោក Mahmoud Abu Watfa ត្រូវបានសម្លាប់ និងជាច្រើននាក់ផ្សេងទៀត បានរងរបួស នៅក្នុងការវាយប្រហារតាមផ្លូវអាកាស យ៉ាងហោច៣៥លើករបស់អ៊ីស្រាអែលនៅទូទាំងតំបន់ហ្កាហ្សា។

យោធាអ៊ីស្រាអែល បានប្រកាសថាខ្លួនបានដឹកនាំ ការវាយប្រហារតាមផ្លូវអាកាសទ្រង់ទ្រាយធំមួយ ប្រឆាំងនឹងក្រុមហាម៉ាស នៅទូទាំងតំបន់ហ្កាហ្សា បន្ទាប់ពីកិច្ចចរចាស្ដីពីបទឈប់បាញ់បានជាប់គាំង។ ការិយាល័យនាយករដ្ឋមន្ត្រីអ៊ីស្រាអែលវិញ ក៏បានបញ្ជាក់ដែរថាលោកនាយករដ្ឋមន្ត្រី Benjamin Netanyahu បានចេញបញ្ជាឱ្យយោធាអ៊ីស្រាអែល ចាត់វិធានការសកម្មភាពដ៏ខ្លាំងក្លាប្រឆាំងក្រុមហាម៉ាស ជាការឆ្លើយតប ទៅនឹងការបដិសេធរបស់ក្រុមមួយនេះ ចំពោះការដោះលែងចំណាប់ខ្មាំង និងបានច្រានចោលរាល់សំណើបទឈប់បាញ់ទាំងអស់។ 

ក្រោយការវាយប្រហារតាមផ្លូវអាកាសរបស់អ៊ីស្រាអែល មន្ត្រីហាម៉ាស លោក Basem Naim បានចោទអ៊ីស្រាអែលថា បានបិទបញ្ចប់បទឈប់បាញ់ដោយឯកតោភាគី ដែលនេះនឹងធ្វើឱ្យចំណាប់ខ្មាំងក្នុងតំបន់ហ្កាហ្សា ស្ថិតក្នុងហានិភ័យ នៃជោគវាសនាមិនច្បាស់លាស់៕