សម្តេចតេជោ ហ៊ុន សែន អញ្ជើញសម្ពោធអគារសិក្សា និងសមិទ្ធផលនានានៅ​វត្តព្រះ​ឥន្ទ​សាមគ្គីធម៌

ខេត្តកណ្តាល៖ នៅព្រឹកថ្ងៃអង្គារ ១៤កើត ខែមាឃ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១១ ខែកុម្ភៈ ឆ្នាំ២០២៥នេះ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា អតីតនាយករដ្ឋមន្ត្រីកម្ពុជា អញ្ជើញជាអធិបតីសម្ពោធអគារសិក្សា និងសមិទ្ធផលនានា នៅបរិវេណវត្តព្រះឥន្ទសាមគ្គីធម៌ ស្ថិតនៅភូមិត្រពាំង​ក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល បន្ទាប់ពីខកខានជួបមុខប្រជាពលរដ្ឋ ជាសាធារណៈ​អស់រយៈ​ពេល​ជាង១ឆ្នាំ បន្ទាប់ពីដាក់ចុះតួនាទីជានាយករដ្ឋមន្ត្រី។

វត្តព្រះឥន្ទសាមគ្គីធម៌ ជាវត្តគណៈធម្មយុត្តិកនិកាយ ទទួលសេចក្ដីសម្រេច​បង្កើតជាវត្តដោយក្រសួងធម្មការ និងសាសនា នៅចុះថ្ងៃទី២០ ខែសីហា ឆ្នាំ២០០៩។

វត្តព្រះឥន្ទសាមគ្គីធម៌ ត្រូវបានបង្កើតឡើងក្រោមព្រះរាជតម្រិះដ៏ខ្ពង់ខ្ពស់​បំផុត​របស់សម្តេចព្រះអភិសិរីសុគន្ធាមហាសង្ឃរាជាធិបតីកិ​ត្តិឧទ្ទេស​បណ្ឌិត បួរ គ្រី សម្តេចព្រះមហាសង្ឃ​រាជ​នៃ​គណៈធម្មយុត្តិកនិកាយ​នៃព្រះរាជាណាចក្រកម្ពុជា នៅខែធ្នូ ឆ្នាំ២០០៧។ នៅពេលនោះជាព្រះគ្រូ​ធម្ម​សោភ័ណវង្ស អានេតា ព្រះរាជលេខាផ្ទាល់សម្តេចព្រះមហាសង្ឃរាជ បួរ គ្រី បាននាំយកបច្ច័យជាព្រះរាជទ្រព្យ​របស់សម្តេច​ព្រះមហា​សង្ឃ​រាជ​ជាអម្ចាស់ ព្រមទាំង បច្ច័យពុទ្ធបរិស័ទ និងសប្បុរសជនមកជាវដីស្រែ​ពី​ប្រជា​​ពល​រដ្ឋនៅភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្ត​កណ្តាល មានទំហំ ២,៩៩៩ ម៉ែត្រការ៉េ ហើយក៏ចាប់ផ្តើមការកសាង​ជាបន្តបន្ទាប់ បន្ទាប់ពីទទួលសេចក្តីសម្រេចបង្កើតជាវត្តនៅឆ្នាំ២០០៩។

ក្រោមការគ្រប់គ្រងដឹកនាំកសាងដោយផ្ទាល់របស់សម្តេច ព្រះមង្គល​ទេព្វា​ចារ្យ វង្ស អានេតា សម្តេចព្រះសង្ឃនាយករង​នៃគណៈធម្មយុត្តិកនិកាយ​នៃព្រះរាជាណាចក្រកម្ពុជា បច្ចុប្បន្ននេះវត្តព្រះឥន្ទសាមគ្គីធម៌ សម្រេចបាន​នូវសមិទ្ធផលនានាជាច្រើនដូចជា ជាវដីស្រែពង្រីកទីធ្លាវត្តចំនួន ២២,០០០​ម៉ែត្រការ៉េ បន្ថែមទៀត សរុបផ្ទៃដីចំនួន ២៥,០០០ម៉ែត្រការ៉េ កសាង​ព្រះវិហារ១ខ្នង សាលាបុញ្ញសភា១ខ្នង កុដិព្រះសង្ឃ១ខ្នង កម្ពស់៤ជាន់ អគារ​សិក្សាកម្ពស់៣ជាន់១ខ្នង, អគារសិក្សាកម្ពស់៤ជាន់ ១ខ្នង អគារ​សិក្សាកម្ពស់៥ជាន់ ១ខ្នង, អគារអន្តេវាសិកដ្ឋានចំនួន១ខ្នង កម្ពស់៣ជាន់, ផ្ទះបាយចំនួន១ខ្នង កម្ពស់៣ជាន់, បង្គន់អនាម័យចំនួន៤ខ្នង ស្នើនឹង​១០បន្ទប់ និងហេដ្ឋារចនាសម្ព័ន្ធរូបវ័ន្តជាច្រើនទៀត។

ក្រោមកម្លាំងសទ្ធាដ៏រឹងមាំ និងប្រកបសេចក្តីជ្រះថ្លាំ ដើម្បីធ្វើឱ្យវត្តព្រះ​ឥន្ទ​សាមគ្គីធម៌ក្លាយជាគោរពប្រណិប័តន៍ធម៌វិន័យទាំងឡាយរបស់ព្រះសម្មាសម្ពុទ្ធ ក៏ដូចជាបណ្តុះនូវចំណេះដឹងដល់ព្រះសង្ឃផងនោះ សម្តេចតេជោ ហ៊ុន សែន និងសម្តេច​កិត្តិព្រឹទ្ធ បណ្ឌិត ប៊ុន រ៉ានី ហ៊ុនសែន បានឧបត្ថម្ភនូ​វ​ថវិកាកសាងសមិទ្ធផលក្នុងវត្តជាបន្តបន្ទាប់៕