មនុស្សប្រហែល១៥០០នាក់ ស្លាប់ក្នុងអំឡុងបាតុកម្ម ទម្លាក់នាយករដ្ឋមន្រ្តីបង់ក្លាដែស

 ប្រភព៖ Reuters

ដាក្កា៖ មេដឹកនាំស្តីទីនៅបង់ក្លាដែស លោក Muhammad Yunus បានលើកឡើងកាលពីថ្ងៃអាទិត្យ ទី១៧ ខែវិច្ឆិកា ថា មនុស្សសរុបប្រហែល១៥០០នាក់ បានបាត់បង់ជីវិតអំឡុងការធ្វើបាតុកម្មហិង្សាយ៉ាងកក្រើក ដែលបានទម្លាក់នាយករដ្ឋមន្រ្តី លោកស្រី Sheikh Hasina ចេញពីអំណាច ក្នុងឆ្នាំនេះ។

តួលេខថ្មីខាងលើ គឺខ្ពស់ជាងតួលេខផ្លូវការកន្លងមក ដែលមានចំនួនអ្នកស្លាប់ប្រមាណ១០០០នាក់។ បាតុកម្ម ដែលបានចាប់ផ្តើម កាលពីខែកក្កដា ក្នុងទម្រង់ជាចលនាដឹកនាំដោយក្រុមនិស្សិត ប្រឆាំងនឹងប្រព័ន្ធកំណត់កូតាការងាររដ្ឋ បានរីករាលដាលប្រែទៅជា ​ភាពវឹកវរដ៏ប្រល័យបំផុតមួយ គិតចាប់តាំងពីបង់ក្លាដែស ទទួលបានឯករាជ្យនៅឆ្នាំ១៩៧១មក ហើយបានបង្ខំឱ្យលោកស្រី Hasina ត្រូវចុះចេញពីតំណែង និងរត់ភៀសខ្លួន ទៅកាន់ប្រទេសឥណ្ឌា កាលពីខែសីហា។

លោក Yunus ដែលកំពុងដឹកនាំរដ្ឋាភិបាលបណ្តោះអាសន្ន ក្រោយលោកស្រី Hasina ធ្លាក់ពីអំណាច បាននិយាយថា ផែនការសម្រាប់ការបោះឆ្នោតសកលថ្មី នឹងត្រូវបង្ហាញជាសាធារណៈ នៅពេលដែលការធ្វើកំណែទម្រង់ការបោះឆ្នោត ចប់រួចរាល់។ ជាមួយគ្នានេះ លោក Yunus បានគូសបញ្ជាក់ជាថ្មី នូវការប្តេជ្ញារបស់រដ្ឋាភិបាលលោក ចំពោះការទាមទារធ្វើបត្យាប័នលោកស្រី Hasina ពីឥណ្ឌាមកវិញ៕