កូរ៉េខាងជើង៖ ក្រុមឃ្លាំមើលទណ្ឌកម្មថ្មី ដែលដឹកនាំដោយអាមេរិក គឺគ្មានភាពស្របច្បាប់ឡើយ

ប្រភព៖ Reuters

ព្យុងយ៉ាង៖ រដ្ឋមន្រ្តីការបរទេសកូរ៉េខាងជើង នាថ្ងៃអាទិត្យ ទី២០ ខែតុលា បាននិយាយថា ក្រុមឃ្លាំមើលការអនុវត្តទណ្ឌកម្មថ្មីមួយ ដែលដឹកនាំដោយសហរដ្ឋអាមេរិក គឺគ្មានភាពស្រប​ច្បាប់ និងខុសច្បាប់ទាំងស្រុង។

យោងតាមសេចក្តីរាយការណ៍ របស់ប្រព័ន្ធផ្សព្វផ្សាយរដ្ឋកូរ៉េខាងជើង KCNA រដ្ឋមន្រ្តីការបរទេសកូរ៉េខាងជើង លោកស្រី Choe Son Hui បានរិះគន់បន្ថែមទៀតថា ការបង្កើតក្រុមនេះឡើង ស្តែងឱ្យឃើញពី ការប្រមាថរបស់ទីក្រុងវ៉ាស៉ីនតោន ចំពោះច្បាប់អន្តរជាតិ ក៏ដូចជាការរំលោភបំពានដោយឥតលាក់លៀម ចំពោះអធិបតេយ្យរបស់ប្រទេសកូរ៉េខាងជើង។

កាលពីថ្ងៃពុធសប្តាហ៍នេះ អាមេរិក កូរ៉េខាងត្បូង និងជប៉ុន បានប្រកាសពីការបង្កើតក្រុមពហុជាតិថ្មីមួយ ដើម្បីតាមដានការអនុវត្ត​ការដាក់ទណ្ឌកម្មប្រឆាំងកូរ៉េខាងជើង បន្ទាប់ពីរុស្ស៉ីនិងចិន ដែលមានទំនាក់ទំនងជិតស្និទ្ធជាមួយទីក្រុងព្យុងយ៉ាង បានសម្រេចចិត្ត​រារាំងសកម្មភាពឃ្លាំមើលទណ្ឌកម្ម នៅឯអង្គការសហប្រជាជាតិ (UN)។ ក្រុមតាមដានទណ្ឌកម្មថ្មីខាងលើ ក៏នឹងត្រូវចូលរួមដោយប្រទេសចំនួន៨ផ្សេងទៀត ផងដែរ។

កាលពីខែមីនាឆ្នាំនេះ ទីក្រុងមូស្គូ បានបោះឆ្នោតជំទាស់ ការបន្តផ្តល់អាណត្តិប្រចាំឆ្នាំ ដល់ក្រុមអ្នកជំនាញ UN ដែលក្នុងរយៈពេល ១៥ឆ្នាំកន្លងមកនេះ បានទទួលបន្ទុកមើលការខុសត្រូវ លើការអនុវត្តទណ្ឌកម្មរបស់អន្តរជាតិ ដែលមានគោលដៅទប់ស្កាត់ កម្មវិធីមីស៉ីល​និងអាវុធនុយក្លេអ៊ែរ របស់ទីក្រុងព្យុងយ៉ាង។ ចិននាពេលនោះ មិនបានបោះឆ្នោតប្រឆាំងក៏ពិតមែន ប៉ុន្តែបានធ្វើអនុបវាទ៕