អ៊ីស្រាអែល ប្រកាសអះអាង អំពីការស្លាប់របស់ មេដឹកនាំហាម៉ាស

បរទេស៖ ប្រទេសអ៊ីស្រាអែល​បាន​ប្រកាស​ជា​ផ្លូវការ​ថា លោក Yahya Sinwar មេដឹកនាំ​ក្រុម​ហាម៉ាស នៅ​ហ្គាហ្សា​ត្រូវ​បាន​គេ​សម្លាប់រួចទៅហើយនៅក្នុង ការវាយប្រហារកន្លងមក។

លោក Sinwar អាយុ៦២ ឆ្នាំគឺជាមេដឹកនាំនយោបាយរបស់ ក្រុមហាម៉ាស់នៅហ្គាហ្សាចាប់តាំងពីដើមឆ្នាំ ២០១៧ហើយគាត់បានចាប់ផ្តើមកាន់តំណែង ជាអ្នកដឹកនាំពេញលេញនៃក្រុមនៅក្នុងខែសីហាបន្ទាប់ពី Ismail Haniyeh ត្រូវបានធ្វើឃាតនៅទីក្រុងតេហរ៉ង់ប្រទេសអ៊ីរ៉ង់។

កងកម្លាំងការពារអ៊ីស្រាអែល ដែលហៅកាត់ថា IDF បាននិយាយកាលពីថ្ងៃព្រហស្បតិ៍ថា ពួកគេកំពុងតែបើកការស៊ើបអង្កេតថាតើលោក Sinwar ពិតជាស្ថិតក្នុងចំណោមពួកសកម្មប្រយុទ្ធប៉ាឡេស្ទីន ដែលត្រូវបានសម្លាប់នៅក្នុងការប៉ះទង្គិចគ្នា នៅទីតាំងដែលមិនបានបញ្ជាក់នោះមែនឬក៏យ៉ាងណា។ ទោះបីជាយ៉ាងណាក្តីក្រោយមក IDF បានបង្ហោះសារនៅលើបណ្តាញសង្គម X កាលពីល្ងាចថ្ងៃព្រហស្បតិ៍ថា  Yahya Sinwar ត្រូវបានសម្លាប់បានដោយជោគជ័យទៅហើយ Elimnated: Yahya Sinwar ។

យោងតាមសេចក្តីថ្លែងការណ៍ផ្លូវការមួយបានឱ្យដឹងថា រដ្ឋមន្ត្រីការបរទេសអ៊ីស្រាអែលលោក Katz  ក៏បានផ្ញើកំណត់ចំណាំទៅកាន់សហសេវិក ជាច្រើននាក់នៅជុំវិញពិភពលោក ដែលបញ្ជាក់ពីការស្លាប់របស់លោក Sinwar ផងដែរ៕