KOICA ផ្ដល់ជំនួយហិរញ្ញប្បទានឥតសំណងសម្រាប់គម្រោង “ការអភិរក្សនិងថតចម្លងបណ្ណសារសារមន្ទីរឧក្រិដ្ឋកម្មប្រល័យពូជសាសន៍ទួលស្លែង (ដំណាក់កាលទី២)

ភ្នំពេញ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌និង វិចិត្រសិល្បៈ នារសៀលថ្ងៃទី៨ ខែសីហា ឆ្នាំ២០២៤ បានអញ្ជើញជាអធិបតី ជាមួយនឹងប្រធានទី ភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចាំកម្ពុជា និងប្រធានការិយាល័យអង្គការយូណេស្កូភ្នំពេញ ក្នុងពិធីចុះហត្ថលេខាលើកំណត់ហេតុនៃកិច្ចពិភាក្សា និងកិច្ចព្រមព្រៀងផ្ដល់ជំនួយហិរញ្ញប្បទានឥតសំណងពីរដ្ឋាភិបាលនៃសាធារណរដ្ឋកូរ៉េ តាមរយៈទី ភ្នាក់ងារ KOICA សម្រាប់ គម្រោង “ការអភិរក្សនិងថតចម្លងបណ្ណសារសារមន្ទីរឧក្រិដ្ឋកម្មប្រល័យពូជសាសន៍ទួលស្លែង (ដំណាក់កាលទី២)”  នៅសារមន្ទីរទួលស្លែង។

គម្រោង “ការអភិរក្សនិងថតចម្លងបណ្ណសារសារមន្ទីរឧក្រិដ្ឋកម្មប្រល័យពូជសាសន៍ទួលស្លែង (ដំណាក់កាលទី២)” មានរយៈពេល ៥ឆ្នាំ (ឆ្នាំ២០២៤-២០២៨) ដែលចុះហត្ថលេខានាពេលនេះ គឺជាការបន្ត​ពីគម្រោងអភិរក្សនិងថតចម្លងបណ្ណសារសារមន្ទីរទួលស្លែង​ដំណាក់កាលទី១ (ឆ្នាំ២០១៨-២០២១) និង​ជាពិសេស​ការគាំទ្រ​ដល់ដំណើ​​​ការ​ស្នើសុំដាក់បញ្ចូល ​អតីតមន្ទីរឃុំឃាំង​១៣ សារមន្ទីរទួលស្លែង និង​មជ្ឈមណ្ឌល​ជើងឯក ទៅក្នុង​បញ្ជីបេតិកភណ្ឌពិភពលោក​។ សកម្មភាពការងារចម្បងៗដែលគ្រោងអនុវត្តមានជាអាទិ៍៖ ការអភិរក្សបណ្ណសារនិងភស្ដុតាងប្រវត្តិ​សាស្រ្ត, ការផ្សព្វផ្សាយតម្លៃបូជនីយដ្ឋាននៃការចងចាំកម្ពុជា ដើម្បីលើកកម្ពស់ការយល់ដឹងអំពីសន្តិភាព, ការរៀបចំសេវាកម្មផ្ដល់​ព័ត៌មាន និង​ការ​បណ្ដុះបណ្ដាល​មន្ត្រីជំនាញ​ ដោយមានកិច្ចសហការបច្ចេកទេសជាមួយអង្គការយូណេស្កូភ្នំពេញ៕