កិច្ចចរចាជុំវិញកិច្ចព្រមព្រៀងការពារជាតិរវាងជប៉ុន និងហ្វីលីពីន ជិតឈានដល់ទីបញ្ចប់

 ប្រភព៖ Reuters

ម៉ានីល៖​ ឯកអគ្គរដ្ឋទូតជប៉ុនប្រចាំនៅទីក្រុងម៉ានីល បានប្រកាសនៅថ្ងៃព្រហស្បតិ៍ថា ការចរចារវាងប្រទេសជប៉ុន និងហ្វីលីពីន ស្តីពីកិច្ចព្រមព្រៀងការពារជាតិ និងសន្តិសុខ ជិតឈានដល់ទីបញ្ចប់ហើយ។

ហ្វីលីពីនកំពុងបង្កើនទំនាក់ទំនងរបស់ខ្លួនជាមួយបណ្តាប្រទេសជិតខាង និងប្រទេសដទៃទៀត ដើម្បីទប់ទល់នឹងអ្វីដែលខ្លួនពិពណ៌នាថា ជាការឈ្លានពានកាន់តែខ្លាំងឡើងរបស់ចិននៅសមុទ្រចិនខាងត្បូង។

ឯកអគ្គរដ្ឋទូតជប៉ុន លោក Kazuya Endo បានថ្លែងនៅក្នុងសុន្ទរកថាមួយថា «តួនាទីរបស់ប្រទេសហ្វីលីពីនក្នុងការរក្សាស្ថិរភាព និងសន្តិសុខក្នុងតំបន់ គឺមានសារៈសំខាន់ណាស់»។ លោកបន្តថា ការអភិវឌ្ឍដ៏សំខាន់មួយអាចត្រូវបានរំពឹងទុកលើការផ្ទេរឧបករណ៍ការពារជាតិ។
រដ្ឋមន្ត្រីការបរទេស និងការពារជាតិជប៉ុន និងហ្វីលីពីន នឹងជួបប្រជុំគ្នានៅទីក្រុងម៉ានីល នៅថ្ងៃទី៨ ខែកក្កដានេះ សម្រាប់កិច្ចពិភាក្សាដែលអាចរួមបញ្ចូលកិច្ចព្រមព្រៀងការពារជាតិដ៏សំខាន់មួយ ដែលនឹងអនុញ្ញាតឱ្យកងកម្លាំងយោធារបស់ពួកគេទៅទស្សនាទឹកដីរបស់គ្នាទៅវិញទៅមក។

ឯកអគ្គរដ្ឋទូតជប៉ុន លោក Endo បាន​បន្ថែមថា ការ​រក្សា​សន្តិភាព និង​ស្ថិរភាព​នៅ​ច្រក​សមុទ្រ​តៃវ៉ាន់​គឺ​មាន​សារៈសំខាន់​សម្រាប់​តំបន់​ឥណ្ឌូ​ប៉ាស៊ីហ្វិក៕