ពូទីន៖ ផែនការសន្តិភាពអាមេរិក-អ៊ុយក្រែន អាចជាមូលដ្ឋាន នៃកិច្ចព្រមព្រៀង ប៉ុន្តែកងទ័ពអ៊ុយក្រែនត្រូវដកថយ

មូស្គូ៖ ប្រធានាធិបតីរុស្ស៊ី លោក វ៉្លាឌីមៀ ពូទីន បានប្រកាសនៅថ្ងៃព្រហស្បតិ៍នេះថា សេចក្តីព្រាងផែនការសន្តិភាពដែលបានពិភាក្សាដោយសហរដ្ឋអាមេរិក និងអ៊ុយក្រែន អាចក្លាយជាមូលដ្ឋានសម្រាប់កិច្ចព្រមព្រៀងបញ្ចប់សង្គ្រាម ប៉ុន្តែបានព្រមានថា រុស្ស៊ីនឹងបន្តការវាយលុក ប្រសិនបើលក្ខខណ្ឌមិនត្រូវបានបំពេញ។

លោក ពូទីន បានបញ្ជាក់ថា «ជារួម យើងយល់ស្របថា នេះអាចជាមូលដ្ឋានសម្រាប់កិច្ចព្រមព្រៀងនាពេលអនាគត» ដោយបន្ថែមថា សហរដ្ឋអាមេរិកហាក់កំពុងគិតគូរពីជំហររបស់រុស្ស៊ី ទោះបីជាចំណុចខ្លះនៅត្រូវការការពិភាក្សាក៏ដោយ។ លោកក៏បានបង្ហាញឆន្ទៈក្នុងការសន្យាថានឹងមិនវាយប្រហារអឺរ៉ុបផងដែរ ប្រសិនបើមានការស្នើសុំ។

ទោះជាយ៉ាងណា មេដឹកនាំរុស្ស៊ីរូបនេះបានដាក់លក្ខខណ្ឌដ៏តឹងរ៉ឹងថា «កងទ័ពអ៊ុយក្រែនត្រូវតែដកចេញពីទឹកដីដែលពួកគេកាន់កាប់ ហើយបន្ទាប់មកការប្រយុទ្ធនឹងបញ្ឈប់។ ប្រសិនបើពួកគេមិនចាកចេញទេ នោះយើងនឹងសម្រេចរឿងនេះដោយមធ្យោបាយអាវុធ»។

លើសពីនេះ លោក ពូទីន បានចាត់ទុកថ្នាក់ដឹកនាំអ៊ុយក្រែនបច្ចុប្បន្នថា «មិនស្របច្បាប់» ដែលធ្វើឱ្យការចុះហត្ថលេខាលើកិច្ចព្រមព្រៀងដោយផ្ទាល់ជាមួយអ៊ុយក្រែនមានភាពស្មុគស្មាញ។ ហេតុនេះ លោកទាមទារឱ្យកិច្ចព្រមព្រៀងណាមួយត្រូវបានទទួលស្គាល់ដោយសហគមន៍អន្តរជាតិ រួមទាំងការទទួលស្គាល់ទឹកដីដែលរុស្ស៊ីដណ្តើមបាន៕ (Reuters)