មូស្គូ៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន បាននិយាយកាលពីថ្ងៃអង្គារ ទី៧ ខែតុលា ថា កងកម្លាំងរុស្ស៉ីវាយដណ្ដើមយកបានទឹកដីអ៊ុយក្រែនជិត ៥០០០គីឡូម៉ែត្រក្រឡា ហើយថាទីក្រុងមូស្គូនៅតែបន្ត សម្រេចបានភាពចម្រើននៅលើសមរភូមិ។
នេះមានន័យថាក្នុងឆ្នាំ២០២៥នេះ
រុស្ស៉ីដណ្ដើមបានទឹកដីអ៊ុយក្រែនជិត ១ភាគរយ ខណៈកងទ័ពរុស្ស៉ីកំពុងគ្រប់គ្រងជិត
២០ភាគរយនៃទឹកដីអ៊ុយក្រែន។ ក្នុងជំនួបជាមួយមេបញ្ជាការកំពូលៗរបស់រុស្ស៉ី
ចំថ្ងៃខួបកំណើតគម្រប់ ៧៣ឆ្នាំរបស់លោក លោក ពូទីន
បានកត់សម្គាល់ថាកងកម្លាំងអ៊ុយក្រែនបានដកថយចេញពីផ្នែកទាំងអស់នៃសមរភូមិមុខ។
លោកបន្តថាទីក្រុងកៀវកំពុងព្យាយាមវាយប្រហារចូលជ្រៅ ក្នុងទឹកដីរុស្ស៉ី
ប៉ុន្តែថាការវាយប្រហារបែបនេះនឹងមិនអាចកែប្រែស្ថានការណ៍នៅក្នុងសង្រ្គាមដែលអូសបន្លាយពេលជាង៣ឆ្នាំកន្លះមកនេះនោះទេ។
«អំឡុងពេលនេះ
កងកម្លាំងរុស្ស៉ីនៅតែបន្តសម្រេចបានភាពរីកចម្រើន»។
នេះជាការគូសបញ្ជាក់របស់លោក ពូទីន ក្នុងជំនួបជាមួយក្រុមមេបញ្ជាការរុស្ស៉ីនៅឯទីក្រុង
St. Petersburg ដោយបន្ថែមថា «ក្នុងឆ្នាំនេះ
យើងរំដោះបានទឹកដីជិត ៥០០០គីឡូម៉ែត្រក្រឡា»។
សូមជម្រាបថា កាលពីថ្ងៃអង្គារ ក្រសួងការពារជាតិរុស្ស៉ី ក៏បានរាយការណ៍ផងដែរពីការវាយដណ្ដើមយកបានភូមិចំនួន២ទៀតនៅតាមបណ្ដោយសមរភូមិនៅអ៊ុយក្រែន។ យោធាអ៊ុយក្រែនកាលពីខែសីហា កន្លងទៅបានអះអាងការវាយលុករបស់រុស្ស៉ីបានទទួលបរាជ័យ ដោយកងកម្លាំងរុស្ស៉ីមិនអាចវាយដណ្ដើមបានទីក្រុងធំណាមួយនោះទេក្នុងឆ្នាំនេះ៕ (ប្រភព៖ Reuters)
