ភ្នំពេញ៖ នាវាកងទ័ពជើងទឹក ចិននិងអូស្រ្តាលី សរុបចំនួន៣គ្រឿង នៅព្រឹកថ្ងៃទី១០ ខែតុលា ឆ្នាំ២០២៥នេះ បានធ្វើដំណើរមកដល់ប្រទេសកម្ពុជា ដោយចូលសំចតនៅកំពង់ផែស្វយ័តក្រុងព្រះសីហនុ ស្របពេលដែលស្ថានការណ៍ នៅព្រំដែនកម្ពុជា-ថៃ ហាក់មានភាពតានតឹងឡើងវិញ បន្ទាប់ពីភាគីថៃ បានដាក់ឱសានវាទ ឱ្យពលរដ្ឋកម្ពុជា រុះរើលំនៅឋានរបស់ខ្លួន នៅភូមិជោគជ័យនិងព្រៃចាន់ ស្ថិតក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ភាពតានតឹងបង្កឡើងដោយថៃ នាថ្ងៃទី១០ ខែតុលា
ឆ្នាំ២០២៥នេះ ភាគីថៃបានដាក់កងកម្លាំងប្រដាប់អាវុធ រួមមានទាំងគ្រឿងចក្រ
និងបន្លាលួសផង មកឈួសឆាយទន្រ្ទាន លើដែនអធិបតេយ្យកម្ពុជា ទាំងកម្រោល។
នាវាកងទ័ពជើងទឹកចិនទាំង២គ្រឿងនោះ គឺមានឈ្មោះថា
PLAN
83 និងPLAN 988
បានចូលសំចតនៅកំពង់ផែស្វយ័តក្រុងព្រះសីហនុ ចាប់ពីថ្ងៃទី១០-១៤ ខែតុលា ឆ្នាំ២០២៥
ដើម្បីពង្រឹងកិច្ចសហប្រតិបត្តិការល្អ បង្កើនទំនាក់ទំនង និងរឹតចំណងមិត្តភាព
សាមគ្គីភាពឱ្យកាន់តែល្អទ្វេឡើងថែមទៀត រវាងប្រទេសទាំងពីរ (កម្ពុជា-ចិន)។
ដោយឡែកនាវាកងទ័ពជើងទឹកអូស្ត្រាលី ចំនួន០១រឿង
ឈ្មោះ នាវាHMAS Ballarat -FFH155 (Anzac Class FFH) ដឹកនាំដោយវរនាវីទោ
Dean Uren មេបញ្ជាការនាវា នៅកំពង់ផែស្វយ័តក្រុងព្រះសីហនុ
ក្នុងដំណើរបំពេញទស្សនកិច្ច នៅកម្ពុជារយៈពេល៤ថ្ងៃ គិតចាប់ពីថ្ងៃទី១០ ដល់ថ្ងៃទី១៣
ខែតុលា ឆ្នាំ២០២៥ គឺដើម្បីពង្រឹងកិច្ចសហប្រតិបត្តិការល្អ បង្កើនទំនាក់ទំនង
និងរឹតចំណងមិត្តភាព សាមគ្គីភាពឱ្យកាន់តែល្អទ្វេឡើងថែមទៀត រវាងប្រទេសទាំងពីរ
(កម្ពុជា-អូស្ត្រាលី) ៕
