ពូទីន ថាព្រមព្រៀងក្រៅផ្លូវការជាមួយ ត្រាំ ស្ដីពីអ៊ុយក្រែន ចង់រៀបចំជំនួបម្ដងទៀតនៅមូស្គូ

វ៉ាស៊ីនតោន៖ ប្រធានាធិបតីរុស្ស៉ី លោក វ្ល៉ាឌីមៀ ពូទីន បានឱ្យដឹងនៅថ្ងៃសុក្រ ទី១៥ ខែសីហាថារូបលោកបានឈានដល់ការព្រមព្រៀងគ្នាក្រៅផ្លូវការមួយជាមួយប្រធានាធិបតីអាមេរិក លោក ដូណាល់ ត្រាំ ដែលលោកផ្ទាល់និយាយថាអាចនឹងនាំមកនូវសន្តិភាពនៅអ៊ុយក្រែន។

លោក ពូទីន និងលោក ត្រាំ បានជួបគ្នាក្នុងកិច្ចប្រជុំកំពូលមួយធ្វើឡើងក្នុងរដ្ឋ Alaska ដើម្បីពិភាក្សាគ្នាពីសង្រ្គាមរបស់រុស្ស៉ីនៅអ៊ុយក្រែន។ លោក ត្រាំ បានអះអាងពីភាពរីកចម្រើនក្នុង ជំនួបចាយពេលជិត៣ម៉ោងជាមួយលោក ពូទីន ប៉ុន្តែកិច្ចប្រជុំកំពូលនេះបានបិទបញ្ចប់ដោយមិនមានកិច្ចព្រមព្រៀង ឬបទឈប់បាញ់នោះទេ។ ក្នុងសន្និសីទសារព័ត៌មានរួមគ្នាជាមួយលោក ត្រាំ លោក ពូទីន បានគូសបញ្ជាក់ថា «យើងសង្ឃឹមថាការព្រមព្រៀងគ្នាក្រៅផ្លូវការដែលយើងសម្រេចបាន នឹង...ត្រួតត្រាយផ្លូវឆ្ពោះទៅរកសន្តិភាពនៅអ៊ុយក្រែន»។ ប៉ុន្តែ លោក ពូទីន មិនបានបញ្ជាក់លម្អិតថាតើអ្វីទៅជាការព្រមព្រៀងគ្នាក្រៅផ្លូវការរវាងលោក និងលោក ត្រាំ នោះទេ។

សូមជម្រាបថា លោក ពូទីន បានលើកឡើងនូវសំណើរៀបចំកិច្ចប្រជុំកំពូលបន្ទាប់ជាមួយលោក ត្រាំ ក្នុងទីក្រុងមូស្គូ ហើយសង្ឃឹមថានឹងបានជួបលោក ត្រាំ ជាថ្មីក្នុងពេលឆាប់ៗ៕ (ប្រភព៖ AFP)