បារាំង និងអារ៉ាប៊ីសាអូឌីត ថ្កោលទោសការវាយប្រហារជាថ្មីលើតំបន់ហ្កាហ្សា

 ប្រភព៖ Reuters

រីយ៉ាដ៖ ប្រធានាធិបតីបារាំង លោក Emmanuel Macron បានឱ្យដឹងថា លោកបានជជែកជាមួយព្រះអង្គម្ចាស់រជ្ជទាយាទអារ៉ាប៊ីសាអូឌីត Mohammed bin Salman ដោយអ្នកទាំងពីរ បានថ្កោលទោសការបន្តការវាយប្រហារលើតំបន់ហ្កាហ្សា ពីសំណាក់អ៊ីស្រាអែល។

កាលពីថ្ងៃអង្គារសប្តាហ៍នេះ អ៊ីស្រាអែលបានបើកការវាយប្រហារតាមអាកាសលើតំបន់ហ្កាហ្សា បណ្តាលឱ្យមនុស្សជាង ៤០០នាក់ស្លាប់ ហើយនៅថ្ងៃពុធ យោធាអ៊ីស្រាអែល ក៏បានបើកបើកប្រតិបត្តិការវាយលុក ជើងគោកសារជាថ្មីផងដែរ ចំពោះមុខភាពជាប់គាំងនៃបទឈប់បាញ់ដំណាក់កាលទីពីរ។

លោក Macron ​និយាយថា រូបលោកនិងព្រះអង្គម្ចាស់ bin Salman នឹងធ្វើជាសហប្រធានសន្និសីទស្តីពីដំណោះស្រាយរដ្ឋពីរ ដែលមានបំណងស្តារឡើងវិញ នូវទស្សនៈនយោបាយសម្រាប់អ៊ីស្រាអែល និងប៉ាឡេស្ទីន។ លោក Macron បញ្ជាក់ថា ការត្រឡប់ទៅរកបទឈប់បាញ់ គឺចាំបាច់សម្រាប់ការដោះលែងចំណាប់ខ្មាំងនៅសល់ និងដើម្បីការពារអាយុជីវិតជនស៊ីវិល ដោយបន្ថែមថា លោកនិងព្រះអង្គម្ចាស់ bin Salman ក៏បានពិភាក្សាផងដែរ អំពីតម្រូវការដើម្បីធ្វើការរួមគ្នា លើបញ្ហាអនាគតរបស់តំបន់ហ្កាហ្សា៕