អាមេរិកព្រមានដាក់ទណ្ឌកម្មថែមទៀត បើវ៉េណេស៊ុយអេឡា មិនទទួលជនភៀសខ្លួនត្រឡប់ទៅវិញ

 ប្រភព៖ Reuters

វ៉ាស៊ីនតោន៖ រដ្ឋមន្រ្តីការបរទេសអាមេរិក លោក Marco Rubio បានគំរាមថាសហរដ្ឋអាមេរិកនឹងដាក់ទណ្ឌកម្មថែមទៀតលើវ៉េណេស៊ុយអេឡា ករណីដែលប្រទេសនេះមិនទទួលយកពលរដ្ឋខ្លួន ដែលត្រូវធ្វើមាតុភូមិនិវត្តន៍ពីសហរដ្ឋអាមេរិក។

រដ្ឋបាលលោក ត្រាំ កំពុងព្យាយាមបញ្ជូនក្រុមជនអន្ធពាល ២៣៨នាក់ ឱ្យត្រឡប់ទៅប្រទេសវ៉េណេស៊ុយអេឡាវិញ។ កាលពីចុងសប្តាហ៍មុន ក្រុមនេះត្រូវបានបញ្ជូនទៅកាន់ពន្ធនាគារ ដែលមានការពារសុវត្ថិភាពតឹងរ៉ឹង នៅក្នុងប្រទេសអែលសាល់វ៉ាឌ័រ។

នៅលើបណ្តាញសង្គម X លោក Rubio សរសេរថា «លុះត្រាតែរបបដឹកនាំរបស់លោក Maduro ទទួលយកជើងហោះហើរនិរទេស ដោយគ្មានលេស ឬការពន្យារពេល នោះទើបសហរដ្ឋអាមេរិក មិនដាក់ទណ្ឌកម្មធ្ងន់ធ្ងរថ្មីណាមួយទៀត»។ ជុំវិញការបង្ហោះសារនេះ ក្រសួងទំនាក់ទំនងវ៉េណេស៊ុយអេឡា នៅមិនទាន់ឆ្លើយតបចំពោះសំណើសុំអត្ថាធិប្បាយទេ។

លោកប្រធានាធិបតី Nicolas Maduro និងរដ្ឋាភិបាលរបស់លោក តែងតែបដិសេធការដាក់ទណ្ឌកម្មពីសហរដ្ឋអាមេរិក និងប្រទេសដទៃទៀត ដោយនិយាយថា វាជាវិធានការខុសច្បាប់ដែលស្មើនឹងសង្គ្រាមសេដ្ឋកិច្ច ធ្វើឱ្យវ៉េណេស៊ុយអេឡាជួបការលំបាក៕